Filip Ozobiç: Neftçiyə daha çox qol vurmaq istəyirdik, amma 8 top da az deyil

"Qəbələ"nin yarımmüdafiəçisi Filip Ozobiçin azerisport.az saytına müsahibəsi

- "Neftçi" üzərində qələbə (8:0) ilə bağlı nə deyə bilərsiniz?
- Yaxşı matç keçirdiyimizi demək olar. Çox qol vurduq ki, bu da sevindirməyə bilməz. Avropa Liqası çərçivəsində qarşılaşacağımız Belçika "Anderlext"i ilə oyuna yaxşı əhval-ruhiyyədə hazırlaşacağıq.

- İlk yarıdan sonra hesabın 5:0 olduğunu nəzərə alsaq, ikinci hissədə meydana çıxmaq çətin olmadı? Gücünüzə qənaət etməyə çalışdınız?
- Xeyr. Baş məşqçi sona qədər oynamaq lazım olduğunu bildirdi. Daha üç qol vurmağımız da göstərdi ki, biz bu görüşdə qətiyyən arxayınlaşmadıq.

- Daha çox qol vurmaq istəyirdiniz?
- Əlbəttə, daha çox qol vurmaq istəyirdik. Amma 8 qol da az deyil. 100 faizli qol epizodlarının hamısını nəzərə alsaq, hesab 12:0 və ya 13:0 da ola bilərdi.

- Bu qələbənin "Anderlext"lə oyuna nə kimi təsiri ola bilər?
- Bu, artıq tam fərqli oyun olacaq. Sadəcə, ciddi hazırlaşmalı və "Neftçi" ilə matça yanaşdığımız kimi yanaşmalıyıq.

- Hesabda öndə olduğunuza görə komanda yoldaşlarınız müxtəlif kombinasiyalar həyata keçirməyə başladılar. Bu oyunu yaxşı məşq adlandırmaq olar?
- Razı deyiləm. "Neftçi" normal komandadır. Sadəcə, bu gün bizim oyunumuz alındı. Kombinasiyalarımız da yaxşı alınırdı.

- "Qarabağ" bu tur 6, "Qəbələ" 8 cavabsız qolla qalib gəldi. Bu nəticələrdən sonra demək olar ki, çempionluq uğrunda məhz bu iki klub mübarizə aparacaq?
- Bəli. Amma bunun üçün bizim hər oyunda yaxşı oynamağımız lazımdır.

- "Qəbələ" Avroliqanın qrup mərhələsində də uğurlu ola biləcək?
- Belçika klubu zəif deyil. Amma biz də yüksəlişdəyik. Oraya da yalnız yaxşı futbol oynamağa və müsbət nəticə ilə qayıtmaq üçün gedirik.