Krşevan Santini: Neftçi böhranın dibindədir
"Neftçi"nin qapıçısı Krşevan Santini Topaz Premyer Liqasının 4-cü turu çərçivəsində "Qəbələ"yə 0:8 hesabıyla uduzduqları oyundan sonra jurnalistlərin suallarını cavablandırıb. Azerisport.az sizi həmin müsahibə ilə tanış edir:
- Matçla bağlı nə deyərdiniz?
- Nə deyim, bilmirəm. Bu, sadəcə, dəhşət idi. Həyatımın ən pis oyunu idi. Azarkeşlər qarşısında həm özümə, həm də komandama görə üzr istəyirəm. İşə bu cür yanaşma yolverilməzdir.
- Elə ilk yarıda beş qol buraxsanız da, daha çox ikinci qol zamanı səhviniz diqqət çəkdi...
- İkinci qoldakı səhvimə görə də hamıdan üzr istəyirəm. Doğrudan da sırf mənim səhvim idi. Fasilədə komanda yoldaşlarımla da bunu danışdıq. Biz böhranın dibindəyik. Bundan pis ola bilməz.
- Buna görə əvəzləndiniz?
- Məşqçinin qərarı belə oldu. Mən ona psixoloji cəhətdən oynamağa hazır olduğumu söylədim. Amma o, əvəzlənməyimə qərar verdi.
- Komandadan kompensasiyasız getməyə hazırsınız? Və ya digər legionerlərdən belə bir fikirdə olan var?
- Ağır sualdır. İsti başla belə sözlər demək yaxşı olmaz. Düşünmürəm ki, hər şeyi o dərəcədə radikal şəkildə dəyişmək lazımdır.
- Vəli Qasımovun yoxluğu sizə təsir etdi?
- Bu, səbəb deyil. Bu məğlubiyyətin bəraəti yoxdur. Qasımovun durumu ilə bağlı xəbəri biz də oyundan iki saat öncə öyrəndik. Bu, şok effekti yaratdı. Bu məğlubiyyətə görə ondan da üzr istəyirəm.
