Çingiz Abdullayev: Belə davam etsə, analoqu olmayan dəyişikliklər olacaq

"Neftçi"nin Müşahidə Şurasının sədri Çingiz Abdullayev jurnalistlər üçün brifinq keçirib. Azerisport.az sizi həmin açıqlamalarla tanış edir:

"Nə varsa, onu yazırıq, xəbər veririk. Bu gün yazıblar ki, Müşahidə Şurası tam olaraq istefa verib. Bu, düz deyil. Çoxlu şayiələr var.

Vəli Qasımovun vəziyyəti pisləşib, bundan istifadə olunur. Bunlar nəyə lazmdır ki? Mən jurnalistlərlə danışmağa həmişə hazıram. Heç kim yalan xatirinə xəstəxanaya getməz.

Ötən gün toplantımız var idi, bütün məsələlər müzakirə olundu. Müəyyən addımlar atılacaq. Xaricdən mütəxəssis cəlb etmək istəyirik. Veteranları bir araya gətiririk.

"Neftçi" il boyu ancaq məğlub olmayıb ki. Kubokun finalına yüksəlmişdik, avrokuboklara vəsiqə qazanmışdıq. Əvəzedici komandamız çempionatın liderdiri. Yeniyetmələrimiz də yaxşı çıxış edirlər. Əsgər Abdullayevlə Samir Əliyevə də işləməyə imkan vermədilər, az qala hər məğlubiyyətdən sonra istefaları tələb olundu.

Biz işimizi davam etdiririk. Hədəfimiz ən azından ilk üçlükdə yer almaqdır. Buna mütləq nail olmalıyıq. Biz də çempion olmaq istəyirik. Amma obyektivlik var ki, "Qarabağ" hazırda çox güclüdür.

Komandanın oturuşmuş oyununun olmadığını görürük. Bu gün uşaqları topladıq, onlardan daha yaxşı oynamağı tələb etdik. Uduzmaq da olar, amma oyun olmalıdır. Qərar var ki, belə davam etsə, analoqu olmayan dəyişikliklər olacaq.

Hələ heç kim qovulmayıb, amma dəyişikliklər olacaq. Bayramdan sonra görəcəksiniz. Tədricən bu dəyişiklikləri həyata keçirəcəyik. Hələ heç kimi qovmuruq".