Rikardinyo: Hədəfimiz bu mövsüm qızıl medallara sahib çıxmaqdır
"Qəbələ"nin müdafiəçisi Rikardinyo Topaz Premyer Liqasının 4-cü turu çərçivəsində "Neftçi"yə qarşı keçirəcəkləri oyun öncəsi azerisport.az saytının suallarını cavablandırıb:
- Ukraynadakı qısa müddətli toplanışınız necə keçdi?
- Toplanış çox yaxşı alındı. Çempionatda fasilə yarandığından tonusu saxlamağımız üçün Ukraynaya yollandıq. Fikrimcə, bu toplanış bizim üçün çox vacib idi.
- Bu gün qarşılaşacağınız "Neftçi" ilə oyundan nə gözləyirsiniz?
- Həmişəki kimi, müsbət sonluğa ümid edirik. Başqa heç bir nəticə bizi qane etməyəcək.
- İndiki "Neftçi"nin çox ciddi problemlərinin olması sizin üçün üstünlükdür?
- Biz öz komandamız barədə düşünürük. Rəqiblərimizin hansı vəziyyətdə olmasından asılı olmayaraq, hər bir oyun çətindir.
- İki cəbhədə mübarizə aparmaq çətin deyil?
- Heyətimizdə çoxlu futbolçu var. Hər biri də yaxşı oyunçudur. Onlar komandaya həm Premyer Liqa, həm də Avropa Liqasında kömək edə bilərlər. Hər iki turnirdə oxşar səviyyədə çıxış etməliyik. Əminəm ki, "Qəbələ"nin hər iki cəbhədə layiqli mübarizə aparmağa gücü çatacaq.
- Klubunuz transfer pəncərəsinin son günündə Petar Franyiçlə Ruslan Qurbanovu heyətə qatdı. Onlar haqda nə bilirsiniz?
- "Qəbələ" onlarla müqavilə imzalamaqla düz etdi. Hər ikisi bizə kömək edə biləcək oyunçudur. Sadəcə, Franyiçlə Qurbanovun komandaya tam uyğunlaşması, nə qədər faydalı olacağını bilmək üçün zamana ehtiyac var. Əksər futbolçulara yeni oyun üslubuna alışmaq asan olur. Amma bəzən çətinliklə üzləşənlər də tapılır. Biz isə hər bir yeni futbolçuya kömək etməyə hazırıq.
- Komandanızın Premyer Liqadakı hədəfi nədir?
- Çempion olmaq istəyirik. Əlbəttə, asan olmayacaq. Amma qarşımızda duran vəzifə məhz qızıl medalları qazanmaqdır. Bunun üçün əlimizdən gələni edəcəyik. Bütün turnirlərdə qalib gəlmək istəyirik. Rəqiblərimizə də hörmətlə yanaşırıq. Hədəfimizə çatmaq üçün dayanmadan çalışmalıyıq.
- Tezliklə Avropa Liqasında da mübarizə başlayacaq. "Anderlext", "Maynts", "Sent-Etyen"in yer aldığı qrupdan çıxmaq şansınız var?
- Əlbəttə, var. Amma şanslarımızın nə dərəcədə çox olduğunu deyə bilmərəm. Mümkün qədə raz səhv edib, çox yaxşı oynamalıyıq. Çünki rəqiblərimizin heyətində yaxşı oyunçular çoxdur.
