Kakau Azərbaycan millisinin braziliyalılarına tərif yağdırdı

Futzal üzrə Qazaxıstan yığmasının braziliyalı baş məşqçisi Kakau Azərbaycan millisinin çalışdırıcısı, həmyerlisi Miltinyo barədə fikirlərini bölüşüb. Azerisport.az saytına açıqlamasında o, bunları söyləyib:

"Miltinyo gözəl məşqçidir. O, müdafiənin qurulmasında xüsusilə yaxşıdır. Necə kollektiv qurmaq lazım olduğunu əla bilir. Mən Braziliyada oynayanda məşqçim olub. Heç kim müdafiəni onun kimi qurmağı bacarmır. Azərbaycan onu yığmanın sükanı arxasına gətirməklə əla seçim etdi. O, Azərbaycan futzalı üçün çox yaxşı işlər görəcək.

Kolumbiyada keçiriləcək qarşıdakı mundiala gəlincə, həm bizim yığmaya, həm də sizin komandanıza çətin olacaq. Favorit isə həmişəki kimi, Braziliya, İspaniya, Portuqaliya və Rusiyadır.

Komandanızdakı yeni oyunçuları da yaxşı tanıyıram. Məsələn, Bolinya həm Qazaxıstanda, həm də Braziliyada yaxşı çıxışı ilə seçilib. Vassura da fərdi cəhətdən güclü oyunçudur. O, Rusiyada çıxış edən Robinyo kimidir. İstənilən an rəqibin bir neçə oyunçusunu aldadıb, təhlükəli vəziyyət yarada, qol vura bilər. İndi Azərbaycanda çox yaxşı legionerlər var. Millinin məşqçilər korpusuna cəlb olunan Biro Jade də Azərbaycan üçün çox iş görüb. Fikrimcə, mən Qazaxıstan "Kayrat"ında necə tarix yazmışamsa, o da Azərbaycan futzalında elə biridir. Ona hörmətlə yanaşıram və gələcək işlərində uğurlar arzulayıram".