Riçard Almeyda: Baş məşqçi bizdən daha da artırmağı tələb edir
"Qarabağ"ın yarımmüdafiəçisi Riçard Almeyda Topaz Premyer Liqasının 4-cü turu çərçivəsində AZAL üzərində qazandıqları 6:0 hesablı qələbədən sonra jurnalistlərin suallarını cavablandırıb. Azerisport.az sizi həmin müsahibə ilə tanış edir:
- Oyun barədə nə deyə bilərsiniz?
- Biz meydanda baş məşqçinin dediklərini həyata keçirməyə çalışdıq. Fikrimcə, buna yaxşı şəkildə nail olduq və yaxşı nəticəyə imza atdıq.
- Bu oyunu yüngül məşq də saymaq olar?
- Xeyr. Bu oyunun məşqə bənzədiyinə dair fikrinizlə razı deyiləm.
- Avropa Liqasının qrup mərhələsindəki ilk rəqibiniz - Çexiya "Slovan"ının məşqçisi də bu oyunu canlı izləyirdi. Sizcə, onun gözünü qorxuda bildiniz?
- "Slovan"dan kiminsə bu oyunu izlədiyini bilmirdim. Biz heç kimi qorxutmuruq. Şadam ki, ələ düşən qol şanslarıdnan yaxşı yararlandq. Komanda olaraq, yaxşı oynadıq.
- "Slovan"ın məşqçisi sizin oyununuzu xüsusi qeyd etdi...
- Onun nə deməsindən asılı olmayaraq, mən meydanda öz işimi görürəm. Qurban Qurbanov bizdən hər mövsüm daha da artırmağı tələb edir. Mən də baş məşqçimizin bütün tələblərinə əməl etməyə çalışıram. Amma təbii ki, onun haqqımda xoş sözlər söyləməsi də xoşdur.
- Çexiya klubu ilə "Dalğa Arena"da oynamalı olacaqsınız. Bunu necə qarşıladınız?
- Biz Tofiq Bəhramov adına respublika stadionunda oynamaq istəyirdik. Amma qazonun vəziyyəti bizim bu istəyimizə mane olur. Elə də ciddi fərq yoxdur. Sadəcə, azarkeş sayı az olacaq.
- Üçüncü cəhdinizdə qrupdan çıxa biləcəksiniz?
- Qrupumuz elə də asan deyil. Amma biz istəyimizə çatmaq üçün əlimizdən gələni edəcəyik.
