Taşkın İltər: Dənizlisporda əsas heyət üzvü olmaq istəyirəm

Azərbaycanın gənclərdən ibarət yığma komandasının yarımmüdafiəçisi Taşkın İltər Türkiyənin "Dənizlispor" klubuna keçidindən danışıb. Azerisport.az saytına açıqlamasında o, bunları söyləyib:

"Bir müddət əvvəl federasiya ilə bağlı problem vardı, amma avqustun 31-də o da həllini tapdı. Yeni klubumda məşqlərə başlamaq və əsas heyətə düşmək istəyirəm. Öncə "İnter"dən təklif alsam da, sonda "Dənizlispor"u seçdim. Ümid edirəm ki, orada uğurlu çıxış edə biləcəyəm.

Azərbaycan yığmasında oynamağa qərar verən Dəniz Yılmazla tanışlığım yoxdur. Buna görə də bu barədə heç bir şərh verə bilmərəm. Ümid edirəm ki, mən də Azərbaycan yığmasına dəvət alacağam. Bu, mənim hədəfimdir. Bunun üçün çox çalışmağım lazımdır".