Kazbek Tuayev: Ruslar Ramil Şeydayevi əldən buraxdıqlarına görə özləri günahkardır
AFFA İcraiyyə Komitəsinin üzvü Kazbek Tuayev Azərbaycan yığmasının DÇ-2018-in seçmə mərhələsi çərçivəsində San Marino üzərində qazandığı qələbəni (1:0) şərh edib. Azerisport.az saytına açıqlamasında o, bunları söyləyib:
"Azərbaycan yığmasının qələbə ilə başlamasına şadam. Düzdür, qələbə parlaq olmadı. Amma gəlin bu qələbəni bayram edək. Ötən gün AÇ-2016-nın iştirakçısı Macarıstan Farer adaları ilə heç-heçəyə razılaşdı. Komandamız ikinci turda Norveçə də uduzmayacaq. Hiss olunur ki, Robert Prosineçki də ilk oyundan narazıdır. Bu, yaxşıdır. Deməli, yetirmələrindən daha çox şey gözləyir. Bütövlükdə, bizi çox çətin seçmə mərhələ gözləyir.
Emin Mahmudovla Ramil Şeydayevin debütünə də sevindim. Onlar öz ölkələrinin yığma komandalarında oynayacaqlarına görə fəxr etməlidirlər. Rusiya futbol ictimaiyyətinin Ramili əldən buraxdıqlarına görə verdiyi açıqlamalara gəlincə, bu, artıq onların öz problemidir. Ramil düzgün seçim edib. Ruslar isə onu buraxdıqlarına, bərbad Dzyubaya üstünlük verdiklərinə görə özləri günahkardır. O, hələ özünü sübut edəcək".
