Nazim Süleymanov: Ən azı 2-3 qol vuracağımızı gözləyirdim

Azərbaycan yığmasının sabiq hücumçusu və kapitanı Nazim Süleymanovun azerisport.az saytına müsahibəsi

- Azərbaycanın gənclərdən ibarət yığma komandasından AÇ-2017-nin seçmə mərhələsi çərçivəsində Farer adalarına qarşı keçirəcəyi oyundan nə gözləyirsiniz?
- Qələbə gözləyirəm. Bu oyunda daha 3 xal qazanmaq lazımdır. Düzdür, turnir cədvəli baxımından bu qələbə bizə heç nə verməyə bilər. Amma qazanılan hər bir xal çox önəmlidir. Bu, uşaqlar üçün də bir stimuldur. Ola bilər ki, seçmə mərhələni daha münasibət pillədə başa vuraq.

- Razısınız ki, Farer adaları millimizdən xeyli zəifdir və futbolçularımız bu görüşdə qələbə qazanmağa borcludurlar?
- Gəlin rəqibə hörmət edək. Ciddi yanaşmaq lazımdır. Futbolçularımız peşəkardırlar və əminəm ki, onlar hər şeyi düzgün qiymətləndirəcəklər.

- Əsas millimiz DÇ-2018-in seçmə mərhələ oyununda San Marinoya cəmi 1 qol vura bildi. Gənclərimiz daha artığını bacara biləcək?
- Qol epizodları olacaq. Hər şey həmin epizodlardan necə yararlanmaqdan asılıdır. Yaxşı oyun, gözəl qollar görmək istəyirik. Təbii ki, qol nə qədər çox olsa, bir o qədər yaxşıdır.

- San Marino üzərində minimal hesablı qələbəni az qala məğlubiyyətə bərabər hesab edənlər var. Sizin buna münasibətiniz necədir?
- Biz hər şeyə narazılığımızı bildirməyə alışmışıq. Şübhəsiz ki, hər birimiz komandamızdan daha yaxşısını gözləyirik. Ən azından 2-3 qol vuracaqlarına ümid edirdik.

- Sizə elə gəlmir ki, millimiz səfərdə qorxaq futbol sərgilədi?
- Qorxmaq ayrıdı, ehtiyatlı oynamaq ayrı. Mən bu qarşılaşmada ehtiyatlı oyunun şahidi oldum. Bizim üçün seçmə mərhələyə qələbə ilə başlamaq vacib idi. İstənilən halda bu nəticəyə də nail olduq.

- Bu oyunla qarşıdakı Norveç və Çexiya ilə görüşlərdə nəyə ümid edə bilərik?
- Çətin ki, komandamız həmin oyunlarda belə çıxış etsin. Bu, hələ mövsümün startıdır. Futbolçular tam formada deyillər.

- "Niyə də yox" şüarına münasibətiniz necədir?
- İştah yemək zamanı yaranır. Futbolçularımızın da hər biri böyük turnirlərdə çıxış etməyi çox istəyirlər. Buna hər kəs nail ola bilmir. Amma niyə də bu nəsil belə bir uğura imza atmasın?

- Ramil Şeydayevlə Emin Mahmudovun gəlişi ilə komandamızın uğur qazanmaq şansı artıb?
- Onlara vaxt lazımdır. Hər iki futbolçu öz klubunda mütəmadi oynamalıdır ki, yığmada da öz potensialını aça bilsin. Bir halda ki, onları yığmaya dəvət ediblər, deməli, komandamızı gücləndirəcək gücdədirlər.