Məhəmməd Mirzəbəyov: San Marino bizim əsas rəqibimiz deyil

Futbol üzrə Azərbaycan yığmasının müdafiəçisi Məhəmməd Mirzəbəyovun azerisport.az saytına müsahibəsi

- San Marino üzərində qələbəni necə şərh edərdin?
- O qədər də ağır oyun olmadı. Topa nəzarət bütün matç ərzində bizim əlimizdə idi. Çoxlu qol vəziyyətlərimiz olsa da, onlardan yararlana bilmədik. Amma əsas odur ki, 3 xal qazandıq.

- Sərgilədiyiniz oyundan şəxsən sən razı qaldın?
- Bəli. Biz normal oynadıq, çoxlu qol vəziyyətləri yaratdıq. Sadəcə, təəssüf ki, bir qol vurduq.

- Rəqib azlıqda qaldıqdan sonra niyə təzyiqi daha da artıra, qol vura bilmədiniz?
- Hamı ondan sonra necə oynadığımızı gördü. Hücumlar qurmaqda, qol vəziyyətləri yaratmaqda davam edirdik.

- Sən bir neçə dəfə sağ cinahda qapı qarşısında əlverişli mövqedə olan komanda yoldaşlarına dəqiq ötürmə edə bilmədin. Buna nə mane oldu?
- Həmin epizodların təkrarına baxmışam. Bir qədər tələsdim. Ona görə də elə oldu.

- San Marino azlıqda qalandan sonra işiniz asanlaşdı?
- Əlbəttə. Rəqib daha çox boş zona verməyə başladı. Biz isə topla daha çox davranmağa başladıq.

- Razısan ki, millidə çatışmazlıqlar hələ çoxdur?
- Fikrimcə, hər şey qaydasındadır. Sadəcə, qol vəziyyətlərindən yararlanmaqda çətinlik çəkirik. San Marinoya da daha çox qol vura bilərdik.

- Bu qələbədən sonra millimizin dəqiq qrup sonuncusu olmayacağını demək olar?
- Millinin qarşısında daha böyük hədəflər durur. Biz də daha yaxşı nəticəyə nail olmaq istəyirik San Marino bizim qrupdakı əsas rəqibimiz deyil.

- Matçdan sonra rəqib futbolçu səninlə formasını dəyişmək istəsə də, bundan imtina etdin. Bunu necə izah edərdin?
- Çünki formamı başqasına verəcəyimə söz vermişdim. Ona görə də həmin futbolçunun istəyini qəbul etmədim.

- Emin Mahmudovla Ramil Şeydayevin millidəki debütü barədə nə deyə bilərsən?
- Onların hər ikisi istedadlı futbolçudur. Fikrimcə, onlar seçmə mərhələdə bizə kömək edə biləcəklər.