Ağabala Ramazanov: Yeganə hədəfimiz qələbə qazanmaqdır

Futbol üzrə Azərbaycan yığmasının hücumçusu Ağabala Ramazanov DÇ-2018-in seçmə mərhələsi çərçivəsində San Marinoya qarşı keçiriləcək səfər oyunu öncəsi azerisport.az saytının suallarını cavablandırıb:

- San Marino ilə oyundan nə gözləyirsən?
- Bu oyuna çox ciddi hazırlaşmışıq. Yeganə hədəfimiz, istəyimiz qələbə qazanmaqdır. San Marino ilə matç bizim üçün çox vacibdir. Yeni seçmə mərhələyə qələbə ilə başlamaq istəyirik.

- Bu rəqib barədə nə bilirsən?
- San Marino komandası barədə məlumatımız var. Belə rəqiblərlə oyunlara ciddi yanaşmaq lazımdır. Çünki bu, seçmə mərhələ oyunudur və arxayınlaşmaq olmaz. Ona görə də rəqib barədə çox danışmağa ehtiyac duymuram.

- Ramil Şeydayevlə Emin Mahmudov millimizə nə dərəcədə kömək edə bilər?
- Onların hər ikisi yaxşı potensiala malikdir. Çox ümid edirəm ki, Şeydayevlə Mahmudovun millimizə böyük faydası olacaq.

- Onlarla məşqlərdə uyğunlaşa bilmisiniz?
- Çox gözəl və mehriban kollektivimiz var. Hər kəsin bir-biri ilə gözəl münasibəti var. Ramil və Eminlə də bağlı heç bir problem olmadı. Bu baxımdan da hər şey yaxşıdır.

- San Marinoya qalib gələ bilməyəcəyiniz halda ciddi tənqidlərə hazırsınız?
- Allah eləsin ki, uğursuzluqla üzləşməyək. Biz meydana ancaq qələbə üçün çıxacağıq.