Robert Prosineçki: San Marinoya qələbə üçün yollanırıq

Futbol üzrə Azərbaycan yığmasının baş məşqçisi Robert Prosineçki DÇ-2018-in seçmə mərhələsi çərçivəsində San Marinoya qarşı keçiriləcək səfər oyunu öncəsi jurnalistlər üçün brifinq keçirib. Azerisport.az xəbər verir ki, xorvatiyalı mütəxəssis öncə bunları söyləyib:

- Qarşıdakı oyuna yaxşı hazırlaşırıq. Artıq 8 gündür bir yerdəyik. Bütövlükdə, toplanışdan razıyam. Düzdür, bütün futbolçular ilk gündən bizimlə deyildi. Təəssüf ki, Bədavi Hüseynovla Bədavi Hüseynov zədələndiyi üçün bizə kömək edə bilməyəcək.

- Kamran Ağayevin oyun təcrübəsinin olmaması sizi narahat etmir?
- Təəssüf ki, az oynayıb. Amma məşqlərdən razıyam. Ölkənin ən yaxşı qapıçıları bizimlədir. Komandanın hər bir üzvündə yaxşı motivasiya var.

- Start heyətini müəyyənləşdirmisiniz?
- Heyəti təxminən bilirəm. Amma onu sizə oyundan bir gün öncə açıqlayacağam. Çünki qarşıda hələ üç günlük məşqimiz var.

- Bədavinin mövqeyində kim oynayacaq?
- Bədavinin yoxluğu xoşagəlməz məqamdır, amma faktdır ki, olmayacaq. Qalan bütün oyunçular oynamağa hazırdır. Hər birinin oynaması mümkündür.

- San Marino ilə oyunda şanslar barədə nə düşünürsünüz?
- Futbolda hərdən zəiflər də güclü komandalara qalib gəlir. Biz səfərə qələbə üçün yollanırıq. Komandaya güvənirik.

- Ufuk Budak və Toğrul Erat niyə millidə deyil?
- 23 futbolçu çağırmışam. Onları isə gələcək toplanışlara çağıracağam.

- Emin Mahmudovla Ramil Şeydayev ilk dəqiqələrdən meydanda olacaq?
- Hələ bilmirəm. Siz start heyətini öyrənməyə çalışırsınız. Amma deməyəcəyəm. Onların hər ikisindən razıyam. Təəssüf ki, klublarında oynamırlar. Lakin yaxşı məktəb keçdikləri hiss olunur. Gələcək üçün bizə faydalı olacaqlarına inanıram.