Rövnəq Abdullayev: Əsas hədəf AÇ-2020-də iştirak etməkdir
Bu gün baş tutan İcraiyyə Komitəsinin növbəti iclasından sonra AFFA prezidenti Rövnəq Abdullayev jurnalistlərin suallarını cavablandırıb. Azerisport.az xəbər verir ki, o, bunları söyləyib:
- İlk növbədə dünya çempionatına yollanan futzalçılarımızla görüşdük. Futzalda bir sıra uğurlarımız var. Yığmamız üçün əsas hədəf qrupdan çıxmaqdır. Bundan əlavə, bugünlərdə Avroliqanın Promofinalında uğurlu çıxış edən çimərlik futbolu üzrə yığma komandamızla bağlı müzakirələr aparıldı. Danışılmış oyunlarla əlaqədar müzakirələr apardıq, razılaşma imzaladıq. Hər kəsi bizə qoşulmağa çağırıram. Çünki bu, bütövlükdə dünya futbolunda böyük problem hesab olunur.
- Mətbuatın yazdığına görə, sizin "Bakı"nın prezidenti Hafiz Məmmədovla görüşünüz olub...
- Belə bir görüş olmayıb. "Bakı" Azərbaycan futbolunda böyük iz qoyub. Ötən il FİFA onların 15 xalını sildi, qoyduqları bütün tələblərin yerinə yetirilməsini istədi. Klub birinci divizionda oynasaydı, buna görə FİFA qarşısında cavab verməli olacaqdıq.
Bizim əsas problemimiz sponsorlarla bağlıdır. Bir-iki il sponsorluq edib, klubu atırlar. Biz futbolun inkişaf fondu yaratmışıq. Kasıb klublara kömək etməyə çalışırıq. AFFA-nın belə işlərlə məşğul olması düzgün deyil. Bundan sonra bu işləri həmin Fond həyata keçirəcək. Futbola sponsorluq etmək istəyən hər kəs bu Fonda pul yatıra bilər. Amma sponsorlar komandanı götürən kimi Premyer Liqada oynamaq, uğur qazanmaq istəyirlər, özlərini reklam edirlər. Bunu arzulayan varsa, lisenziya almalı, bütün prosedurlardan keçməlidir.
SOCAR – "Neftçi"nin sponsorudur, amma klubu idarə etmir. Biz bu komandanın işlərinə qarışmırıq. Premyer Liqada klubların sayının azalması təbii ki, mənfi haldır. Amma bu, lazım idi.
- San Marino ilə seçmə mərhələ oyunundan nə gözləyirsiniz?
- Yığmaya uğurlar arzulayırıq. Seçmə mərhələyə qələbə ilə başlamağımızı istəyirik. Amma asan olmayacağını da bilirik. Bizim əsas hədəfimiz AÇ-2020-yə vəsiqə qazanmaqdır.
- "Neftçi"nin indiki durumu barədə fikirləriniz maraqlıdır...
- "Neftçi"ni bu duruma Müşahidə Şurası salmayıb. Klubların uğursuz çıxışı barədə mənim danışmağım düzgün olmaz. Mənim dövrümdə Qurban Qurbanovla komanda bir-iki oyunda uduzan kimi, onun istefası tələb olunmağa başladı. Məşqçilərə şans vermək lazımdır. Bizim azarkeşlərlə də bağlı problem var. Hətta deyərdim ki, əsas problemdir. Camaat çempionat oyunlarına gəlmir. Hətta "Bakcell Arena" da dolmur. Klublar bu yöndə iş aparmalıdırlar.
