Ramil Şeydayev: San Marino kimi rəqiblərə qalib gəlməyə borcluyuq

Futbol üzrə Azərbaycan yığmasının və Türkiyənin "Trabzonspor" klubunun hücumçusu Ramil Şeydayevina zerisport.az saytına müsahibəsi

- Azərbaycan yığmasına dəvət almağınız sizin üçün sürpriz olmadı?
- FİFA-nın Azərbaycan yığmasında oynayacağıma razılıq verəcəyini gözləyirdim. Ona görə də bu qərar məni təəccübləndirmədi. Çünki mən Rusiyanın əsas yığmasında forma geyinməmişdim.

- Millimizdə necə qarşılandınız?
- Yaxşı, hətta deyərdim ki, əla. Mənim həm yığmada, həm də klubda komanda yoldaşlarım baxımından bəxtim gətirib.

- Sizcə, Ramil Şeydayevlə Emin Mahmudov Azərbaycan yığmasını nə dərəcədə gücləndirə biləcək?
- Fikrimcə, bunu qarşıdakı seçmə mərhələdə görə biləcəksiniz.

- Qarşıda San Marino ilə oyun var. Şanslar barədə nə düşünürsünüz?
- Fikrimcə, sualı düzgün qoymadınız (gülür). Soruşmaq lazım idi ki, San Marinonun şansları necədir? (gülür). Fikrimcə, daha üst səviyyəyə çıxmaq, qarşıya qoyulan hədəflərə çatmaq üçün belə rəqibləri məğlub etməyə borcluyuq.

- Yəqin ki, növbəti mundialın Rusiyada keçirilməsi sizin üçün əlavə stimul olacaq...
- Dünya çempionatına vəsiqə qazanmaq təkcə mənim yox, bütövlükdə, Azərbaycan yığması üçün stimuldur. Kimə qarşı oynamağımızdan asılı olmayaraq, 100 faiz gücümüzü meydanda qoymağa çalışacağıq.
 
- Azərbaycan yığmasını seçməyinizə Rusiyada necə reaksiya verdilər?
- Kimlərsə dəstəklədi, kimlərsə tənqid etdi. Amma bu, mənim qərarımdır.

- Emin Mahmudov deyir ki, Azərbaycan dilində danışa bilir, hətta himni də öyrənib. Bəs sizdə bu baxımdan vəziyyət necədir?
- Məndə bir az pisdir (gülür). Amma öyrənməyə çalışıram.

- Sosial şəbəkələrdə yayılan şəkillərinizin birində ləzginka oynadığınız diqqət çəkirdi. Belə demək olar ki, "Trabzonspor"a tez uyğunlaşdınız?
- Bəli, elədir. Amma bu, həm də oradakı kollektivin xidmətidir. Uşaqlar mənə çox kömək etdilər.

- "Trabzonspor"da hələ rəsmi debütünüz baş tutmayıb...
- Ümid edirəm ki, tezliklə o da baş tutar.