Roman Qriqorçuk: Qrupdan çıxmaq şansımız var
"Qəbələ"nin baş məşqçisi Roman Qriqorçukun azerisport.az saytına müsahibəsi
- Avroliqanın qrup mərhələsində "Anderlext" (Belçika), "Sent Etyen" (Fransa) və "Maynts" (Almaniya) ilə qarşılaşacaqsınız. Püşkün nəticəsi sizi qane etdi?
- Püşkü sifariş etmək mümkün deyi. Necə varsa, elə də qəbul etmək lazımdır. Biz də hər şeyi sakit qarşıladıq. Avropa Liqasının əsas mərhələsində mübarizə aparacağımız üçün sevincliyik. Rəqiblərimizin də hamısına hörmətlə yanaşırıq. Burada da layiqli çıxış etməyə çalışacağıq.
- Razısınız ki, püşk sizə daha güclü rəqibləri çıxara bilərdi?
- Bəli, daha çətin qrupda da yer ala bilərdik. Amma biz top klub deyilik və buna görə açıqlamalarımızda ehtiyatlı olmalıyıq. İstənilən rəqib bizim üçün çətindir. Lakin bir daha qeyd edirəm ki, ardıcıl ikinci mövsümdə qrup mərhələsinə vəsiqə qazanmağımız bizim üçün qürurvericidir.
- Bu rəqiblərdən hansına qarşı oynamaq daha maraqlı olacaq?
- Hansınısa fərqləndirmək istəməzdim. Bütün rəqiblərimiz güclüdür, adlı-sanlı komadadır. Artıq onlar haqda ətraflı məlumat toplamağa çalışacağıq.
- Bu qrupu ötən mövsümdəkindən daha yaxşı saymaq olar?
- Həmin qrupdakından asan olacağını düşünmürəm. Amma bu qrupdan çıxmaq şansımız var. Dəqiq neçə faiz olduğunu deyə bilmərəm. Lakin azacıq da olsa, şans varsa, bundan istifadə etməliyik.
- Bəs "Qarabağ"ın qrupu barədə nə düşünürsünüz?
- Onlar kiminlə düşüb ki? Mən indi Ukraynadayam və özümüzün də kimlərlə qarşılaşacağımızı yenicə öyrənmişəm.
- "Fiorentina", PAOK və "Slovan"la...
- Əla (gülür). Ötən mövsüm biz PAOK-la oynamışdıq. Bizə onların keçmiş rəqibləri düşüb, onlara da bizim (gülür). Bəs "Mançester Yunayted" hansı klublarla düşüb?
- Onlar A qrupunda "Fənərbaxça", "Feyenoord" və "Zarya" ilə qarşılaşacaqlar...
- (gülür) "Zarya"nın baş məşqçisi onlarla oynamağımızı istəyirdi. Mən də "Zarya" ilə bir qrupda oynamağımızı istərdim. MY və "Fənərbaxça"ya qarşı oynamaq maraqlı olardı.
