Qurban Qurbanov: İsveçdə çox səhvə yol verdiyimizi düşünmürəm

"Qarabağ"ın baş məşqçisi Qurban Qurbanov Azərbaycan Premyer Liqasının 3-cü turu çərçivəsində "Neftçi"yə qarşı keçirdikləri oyunu şərh edib. Azerisport.az xəbər verir ki, Ağdam klubunun çalışdırıcısı 3:0 hesabıyla bitən qarşılaşmadan sonra bunları söyləyib:

"İlk növbədə özümüzü düşünürdük. Çünki oyunçularda yorğunluq vardı. Buna görə də bu matçda heyətlə bağlı dəyişiklik etmişdik. İstənilən halda hər bir futbolçuya güvənməyə çalışırıq. Hesab hətta 2:0, 3:0 olarkən də sonadək mübarizə apardıq. Əlhərbini meydanın mərkəzində oynatdıq. O, əvvəllər də bu mövqedə oynamışdı. Normal oynadı, özünü yaxşı tərəfdən göstərdi. Baxmayaraq ki, müəyyən çatışmazlıqlar da var. Dino Ndlovu da özünü normal göstərdi. Amma dərhal uyğunlaşmaq bir qədər çətindir. Həm fiziki, həm də oyun baxımından artırması lazımdır. Onun özünü yaxşı tərəfdən göstərməsi üçün zamana ehtiyac var".

Qurbanov İsveç "Qöteborq"una qarşı Avropa Liqasının pley-off mərhələsi çərçivəsində keçirəcəkləri cavab oyunundan da söz açıb: "İsveçdəki oyunda çoxlu səhvə yol verdiyimizi düşünmürəm. Bütün oyunu hücumda keçirdik. Rəqib isə cərimə zərbəsindən fərqləndi, gözəl qol vurdular. Qarşıdakı oyunla bağlı bəzi dəyişikliklər edəcəyik. Yaxşı nəticə qazanmağa çalışacağıq". (CBC)