Bursasporun forvardı: Azərbaycan yığmasının təklifini qəbul etdim

Türkiyənin “Bursaspor” klubunun oyunçusu Dəniz Yılmaz Azərbaycan yığmasından aldığı təklifi qəbul edib. Azerisport.az xəbər verir ki, hücumçu bunu Türkiyə mətbuatına açıqlamasında bildirib.

Neçə illərdi ölkəsinin yığmasında oynamağı arzulasa da, heç vaxt dəvət almayan Yılmaz 3 ildi yığmamızdan ona təklif edilən dəvəti nəhayət sonda qəbul edib. Futbolçu millimizi seçməsini belə şərh edib:

“9 ildi Türkiyə yığmasından dəvət gözləyirəm. 16 yaşlılardan ibarət komandada çıxış edəndə Avropa çempoinu olduq və o zamandan bəri əsas yığmadan təklif gözləyirəm. Bir çox komanda yoldaşlarım əsas millidə oynayır. Mən buna çox pis oluram. Gələn təkliflə bağlı atam, menecerim Ərdəm Karagöl, “Bursaspor”dakı məşqçilərim və rəsmilərlə məsləhətləşdim. Onlar həmişə gözləməyimi məsləhət gördülər. Ən son AÇ-yə çağrılan ilkin heyətə belə dəvət almadım. Bu mənə təsir etdi və bundan sonra ümidim üzüldü. Həmişə ay-ulduzlu formanı geyinmək istəmişəm. Ona görə də bu qərarı çətinliklə qəbul etdim”.

Qeyd edək ki, 28 yaşlı futbolçu bu il bursalıların heyətində meydana çıxdığı 12 qarşılaşmada 5 qol vurub.