Roman Qriqorçuk: Rəqib matçın tempini qəsdən aşağı salırdı
"Qəbələ"nin baş məşqçisi Roman Qriqorçuk Avropa Liqasının pley-off mərhələsi çərçivəsində Sloveniya "Maribor"u ilə oyundan sonra fikirlərini bölüşüb. Azerisport.az sizi ukraynalı mütəxəssisin fikirləri ilə tanış edir:
- Özünüzü hesab 0:1 olanda necə hiss edirdiniz, 3:1-dən sonra necə hiss etməyə başladınız?
- Hesabı lehimizə çevirmək barədə düşünürdüm. Hiss edirdim ki, dərhal qol vurmalıyıq. İndi də fərqli bir hiss keçirmirəm. Eyforiyaya qapılmamışam. Bu görüşü tez təhlil edib, növbəti matça yaxşı hazırlaşmalıyıq.
- Hesabda belə tez geri düşəcəyinizi gözləyirdinizmi?
- Artıq indi həmin vaxt nə düşündüyümü xatırlamıram. İndi məni daha çox qarşıdakı oyunlar üçün nəyi dəyişə biləcəyim maraqlandırır.
- Ən çox Rafael Santosa qışqırırdınız. Bu, nə ilə bağlı idi?
- Rafanı sevirəm. Qışqırırdım ki, bəzi məqamları düzəltsin (gülür). Amma ona əsəbləşməmişəm.
- Siz meydanın mərkəzini rəqibə qəsdən vermişdiniz, ya kənardan elə görünürdü?
- Müdafiədəki bəzi səhvlər taktiki planla bağlı idi. Amma fasilədə hər şey düzəldi.
- Üçüncü qoldan sonra sanki, komandanız meydanda nə edəcəyini bilmirdi...
- Yəqin ki, bu, strategiyadakı çatışmazlıqdan irəli gəlir. Mən komandanı yenə hücuma səsləyirdim. Müəyyən qol şanslarını boşa verdik. Bəlkə də rəqib qəsdən oyunun tempini aşağı salırdı.
- Rəqib həmkarınız Darko Milaniç üçüncü qolda qapıçıya qarşı qayda pozuntusu olduğunu söylədi...
- Bu barədə nəsə deməyə hazır deyiləm. Çünki həmin epizodu dəqiq görməmişəm, təkrarına baxmalıyam.
- Rəşad Sadiqovun əvəzində meydanın mərkəzində Vitali Vernidubu oynatdınız. Cavab görüşündə də belə olacaq?
- Növbəti oyunumuz barədə danışmağımız hələ tezdir. Cavab matçı üçün heyəti avqustun 25-də səhər saatlarında müəyyənləşdirəcəyəm. Oyunçularımı ayrılıqda qeyd etməyi xoşlamıram. Vernidub ondan nə gözləyirdimsə, onu etdi. Özü də yəqin ki, oyunundan razı qaldı.
