Marko Şuler: Bakıda qol buraxmaq istəmirik
Sloveniyanın "Maribor" klubunun müdafiəçisi Marko Şuler Avropa Liqasının pley-off mərhələsi çərçivəsində "Qəbələ"yə qarşı keçirəcəkləri ilk oyun öncəsi azerisport.az saytının suallarını cavablandırıb:
- Sizcə, "Qəbələ" ilə düşməklə bəxtiniz gətirib?
- Mən belə deməzdim. Əksinə, bizə güclü rəqib düşüb. Amma etiraf etməliyəm ki, daha güclü klublarla da qarşılaşa bilərdik.
- Qarşıdakı oyundan nə gözləyirsiniz?
- Əlbəttə, optimist danışa bilərəm. Amma hamımız gözəl başa düşürük ki, bizi "Qəbələ" ilə çətin oyun gözləyir. Xüsusilə də Bakıdakı ilk oyun bizim üçün çox çətin keçəcək. Amma biz ümidimizi itirmirik. Çünki mübarizə iki 90 dəqiqədən ibarət olacaq. Hər şey ola bilər.
- "Maribor" Bakıda sürpriz edə bilər?
- İlk matçı Bakıda keçirməyimiz yaxşıdır. Amma cavab matçını doğma meydanda keçirməyimiz uğur qazanmağımıza zəmanət verə bilməz. Odur ki, ilk oyunda da müsbət nəticə üçün mübarizə aparmalıyıq.
- Minimal hesablı məğlubiyyət və ya qolsuz heç-heçə sizi qane etməyəcək?
- Biz cavab matçı öncəsi sərfəli nəticə qazanmaq istəyirik. Bakıda qol buraxmaq istəmirik. Qol buraxmasaq, Sloveniyada bizə daha rahat olacaq. Əks halda işimiz xeyli çətinləşəcək.
- "Qəbələ"nin son olaraq Fransanın "Lill" klubunu mübarizədən kənarlaşdırması sizi qorxutmur?
- Xeyr, qorxutmur. Amma rəqibimizə hörmətlə yanaşıram. Nəticələr də göstərir ki, "Qəbələ" hörmət tələb edir.
- "Maribor" "Qəbələ"ni keçə bilməsə, bu, sizin üçün faciə olmayacaq?
- Faciə? Təbii ki, yox. Amma şübhəsiz ki, mərhələ keçə bilməsək, çox təəssüflənərik. Çünki pley-offa qədər gəlib, burada uduzmaq üzücü olar. Arzu edirəm ki, daha layiq olan mərhələ adlasın.
