Roman Qriqorçuk: Mariborun nəyə qadir olduğunu bilirik
"Qəbələ"nin baş məşqçisi Roman Qriqorçuk Avropa Liqasının pley-off mərhələsi çərçivəsində Sloveniyanın "Maribor" klubuna qarşı keçirəcəkləri oyun öncəsi jurnalistlərin suallarını cavablandırıb. Azerisport.az sizi həmin cavablarla tanış edir.
- Ötən mərhələdə Fransanın "Lill" klubu üzərindəki qələbədən sonrakı eyforiya keçib?
- Ondan sonra nə qədər vaxt keçib, hadisə olub. Ona görə də hansısa eyforiyadan söhbət gedə bilməz.
- "Maribor"un oyunlarını izləyə bilmisiniz?
- Bəli. Məlumatım çoxdur. Futbolçulara da təqdim etmişik. Rəqibin nəyə qadir olduğunu bilirik.
- Heyəti müəyyənləşdirmisiniz?
- Heyətlə bağlı öz fikirlərim var. Amma start heyətini tam olaraq sabah müəyyənləşdirəcəyəm.
- Azərbaycanda ən populyar ukraynalısınız. Ukraynalıların dəstəyi sizi qane edir?
- Həmyerlilərim mənə dəstək olurlar. Onların, Ukraynanın Azərbaycandakı səfirinin dəstəyini görmək xoş oldu. Azərbaycanda özümü çox yaxşı hiss edirəm.
- "Maribor" əvvəlki rəqiblərinizdən nə ilə fərqlənir?
- Mən rəqibləri gücünə görə müqayisə etmirəm. Bunu etmək çətindir. Bunlar hamısı subyektiv fikirlərdir. Mən ancaq oyun üslublarına görə müqayisə apara bilərəm. "Maribor" rəngarəng oyun sərgiləyir. Hücuma çox sürətlə keçirlər və bu, onların əsas silahıdır. Komanda real olaraq güclüdür.
- Kapitan Rəşad Sadiqovsuz oynamaq çətin olmayacaq?
- İstənilən oyunçunun itkisi xoşagəlməzdir. Rəşad da bizim üçün önəmli fiqurdur. Yaşına baxmayaraq, o, bu mövsüm çox inkişaf edib. Sabah başqa oyunçuya şans verəcəyk. Buna sakit yanaşmaq lazımdır. Problemlərdən danışmaq istəməzdim.
- Şansları necə dəyərləndirərdiniz?
- Adətən belə proqnozlar vermirəm. Ən azı bir faiz şans varsa, ona görə lazım gəlsə, meydanda ölmək lazımdır. Amma indi bizim şansımızın bir faizdən daha çox olduğunu düşünürəm.
- Bir qədər qayğılısınız. Bu, nə ilə bağlıdır?
- Bu, qarşıdakı oyuna kökləndiyimə görədir. Sabah bizi çox çətin matç gözləyir. Bu rəqibə qalib gəlmək üçün superoyun gözləyir.
