Deyan Kelhar: Qəbələ Maribordan daha şanslıdır
"Qəbələ"nin sabiq müdafiəçisi Deyan Kelharın azerisport.az saytına müsahibəsi
- "Qəbələ"nin Avropa Liqasının pley-off mərhələsi çərçivəsində qarşılaşacağı Sloveniya "Maribor"u sabiq komandanız üçün nə dərəcədə münasibət rəqibdir?
- "Qəbələ"nin "Maribor"la qarşılaşacağını öyrənəndə çox sevindim. Azərbaycanda oynadığım üçün Sloveniyada futbolunuzdan az-çox məlumatı olanlar var. "Qəbələ" də hər gün inkişaf edir. Avropa Liqasının pley-off mərhələsində zəif rəqib olmur. Amma mənə elə gəlir ki, "Qəbələ" "Maribor"la müqayisədə daha şanslıdır.
- Deməli, cütün favoriti kimi "Qəbələ"ni görürsünüz?
- Əslində, kimin favorit olduğunu söyləmək çətindir. Çünki "Maribor"un da avrokuboklarda böyük təcrübəsi var. Tutaq ki, buna görə "Maribor"u favorit saydıq. Bəs belə olan halda komanda öz üzərində təzyiq hiss etsə, onda necə olacaq? (gülür)
- Sloveniya futbol ictimaiyyəti bu görüşlərdən nə gözləyir?
- "Maribor"un heyətində Sloveniya yığmasının futbolçuları çıxış edir. Futbol sahəsində çalışanlar belə hesab edirlər ki, mərhələni "Qəbələ" keçəcək. Amma digərləri də belə qənaətdədirlər ki, "Maribor" zəif rəqiblə düşüb və qrup mərhələsində oynamaq şansı yüksəkdir.
- "Qəbələ"nin sabiq futbolçusu keçmiş komandanıza nə kimi kömək edə, rəqib barədə hansı vacib məqamları deyə bilərsiniz?
- Yaxşı sualdır. Keçmiş komandama kömək etməyə hər zaman hazıram. "Maribor"a qarşı çox oyun keçirmişəm və güclü cəhətlərini bilirəm. Onların nə kimi səhvlər edə biləcəyindən də xəbərim var.
- "Qəbələ" üçün əsas təhlükə mənbəyi Novakoviç olacaq, ya Tavares?
- Hər ikisi güclü futbolçudur və "Qəbələ"yə problem yarada bilər. Vrşiçi də unutmaq olmaz. Əminəm ki, "Qəbələ" "Maribor"un oyununu yaxşı analiz edəcək. "Qəbələ" ev oyununda yaxşı nəticə qazansa, səfərdə üstünlüyünü qoruya bilər.
- Bir neçə gün öncə "Maribor"un iki futbolçusu avtomobil qəzasında dünyasını dəyişdi. Səncə, bu komanda həmin hadisənin şokundan çıxa biləcək?
- Bu, tək "Maribor" üçün qara gecə deyildi. Bizim hər birimiz belə bir aqibətlə üzləşə bilərik. "Maribor" çətin günlərini yaşayır. Fikrimcə, bu faciə futbolçulara və məşqçilərə təsirsiz ötüşə bilməz.
