Katalin Tira: Zirə ilə oyunda problem Denilsonda yox, hamımızda idi

"Neftçi"nin rumıniyalı hücumçusu Katalin Tiranın azerisport.az saytına müsahibəsi

- Premyer Liqanın 2-ci turunda "Zirə"yə uduzmağınıza nə səbəb oldu?
- Təəssüf ki, oyun bizim üçün o qədər də uğurlu alınmadı. Birinci hissə üstünlüyümüz şəraitində keçdi. Qol vəziyyətlərimiz də var idi. Düşünürdüm ki, ikinci yarıda da belə oynayıb, qol vuracağıq. Amma təəssüf ki, alınmadı. Artıq bu oyunu unudub, növbəti görüşləri düşünməliyik. Nəticə qazanmaq üçün daha yaxşı hazırlaşmalıyıq.

- Sizin start heyətdə meydana çıxacağınız gözlənilirdi. 90 dəqiqə oynamağa hazır deyilsiz?
- Fikrimcə, növbəti oyuna tam hazır olacağam. İnanıram ki, baş məşqçi mənə ilk dəqiqələrdən şans verəcək.

- "Neftçi"nin ikinci hissədə hücum xəttinin zəif çıxış etməsi rəqibin müdafiəçilərinin yaxşı oynamasından irəli gəlir, ya başqa səbəb var?
- Hücumçularımızın hamısı qol vurmaq üçün əlindən gələni etdi. Təəssüf ki, biz rəqib qapısına yol axtardığımız məqamda "Zirə" hesabı açdı. Ondan sonra bizim üçün hər şey daha da çətinləşdi.

- Matçın sonunda siz komandanın digər yeni transferi Denilson Pereyraya səsinizi ucaltdınız. Nə problem var idi?
- Problem Denilsonda deyildi. Ona görə əsəbləşmişdim ki, komandamız daha yaxşı oyun sərgiləyə bilərdi. Ən çox da özümə hirslənmişdim.

- Qarşıda sizi "Qarabağ"la oyun gözləyir. Son çempiona qalib gələ biləcəksiniz?
- "Real"a qarşı oynamayacağıq ki, rəqibdən ehtiyatlanaq. "Qarabağ"a niyə də qalib gəlməyək? Biz də onlar kimi futbol oynamağı bacarırıq. Yaxşı nəticə qazanmağa çalışacağıq.

- Artıq Premyer Liqamızda iki oyun keçirmisiniz. Nə düşünürsünüz?
- Əlbəttə, Azərbaycan Premyer Liqasını İtaliya, İspaniya çempionatları ilə müqayisə etmək olmaz. Mən Azərbaycan birinciliyini daha çox Rumıniya çempionatına bənzədirəm.