Migel Lorenso: Bu, Budaq Nəsirovla Emin Mahmudov üçün əla imkandır
"Zirə"nin portuqaliyalı müdafiəçisi Migel Lorenso Premyer Liqanın 2-ci turu çərçivəsində "Neftçi"yə qarşı oyundan (1:0) sonra azerisport.az saytının suallarını cavablandırıb.
- Matç barədə nə deyərdiniz?
- Bizə qələbə lazım idi, ona da nail olduq. Oyuna daha yaxşı köklənmişdik. Xoş qələbə oldu.
- Ölkənin ən iddialı klublarından biri olan "Neftçi"dən belə oyun gözləyirdiniz?
- Azərbaycana gələnə qədər komandalarınız barədə heç bir məlumatım yox idi. Amma bura gələndən bəri klublarınız haqqında informasiya toplamağa çalışıram. Matçdan öncə də yaxşı komandaya qarşı oynayacağımızı bilirdim. Amma "Zirə" də pis komanda deyil. Biz qalib gələcək gücdə olduğumuzu isbatladıq.
- İlk turda uduzmuşdunuz. Bu, komandanızın qeyri-sabit çıxışından xəbər vermirmi?
- "Sumqayıt"a məğlubiyyət bizə əls dərs oldu. Buna görə də "Neftçi" ilə görüşdə yalnız qələbə barədə düşünürdük.
- Portuqaliyada süni örtüklü qazonlar çox azdır. Amma "Zirə"nin arenası süni örtüklüdür. Bu, sizə problem yaratmır?
- Bəli, Portuqaliyada süni örtüklü qazonlar azdır. Uşaqlıqdan həm süni, həm də təbii örtüklü qazonlarda oynamışam. Ümid edirəm ki, burada da heç bir problemim olmaz. Azərbaycana uyğunlaşmağım üçün zamana ehtiyacım var.
- Sizcə, azərbaycanlı futbolçular - Budaq Nəsirovla Emin Mahmudovun Portuqaliyada özlərini göstərmək şansı var?
- Budaqla Emini o qədər də yaxşı tanımıram. Amma düşünmürəm ki, Portuqaliya klubları zəif futbolçular alsın. Deməli, Nəsirovla Mahmudov bacarıqlı futbolçudur ki, onları heyətə cəlb ediblər. Onlara uğurlar arzulayıram. Portuqaliya çempionatı dünyanın ən yaxşılarından hesab olunur. Hər ik futbolçu özünü yaxşı tərəfdən göstərə bilər. Bu, onlar üçün əla imkandır.
