Araz Abdullayev: Neftçini bu vəziyyətdə qoyub xaricə getmək istəmirəm
"Neftçi"nin kapitanı Araz Abdullayev Premyer Liqanın 2-ci turunda "Zirə"yə qarşı oyundan sonra azerisport.az saytının da suallarını cavablandırıb:
- Oyuna mərkəz hücumçusu kimi başladınız, amma matçın bəzi hissələrini cinahda keçirdiniz. Alışmadığınız mövqedə oynamaq rahat deyildi?
- Bu, taktiki gediş idi. İkinci hissədə Katalin Tira meydana çıxandan sonra mən alışdığım mövqeyə keçdim. Mənim üçün bunun fərqi yoxdur. İstənilən mövqedən qol vurmaq istəyirəm.
- Hücumda özünüzü neə hiss edirdiniz?
- Əsas faydalı olmaqdır. Hansı mövqedə oynamaq fərq etmir. Biz bu oyunda "Zirə"ni əksər göstəricilərdə üstələsək də, qol vura bilmədik.
- Əvəzlənməyiniz nə ilə bağlıdır?
- Bu barədə düşünmürəm. Baş məşqçi belə qərar verdi. Dəyişiblərsə, deməli, belə lazım idi.
- İkinci hissədə meydana çıxan yeni transferlər komandanı demək olar ki, gücləndirmədi...
- Onlar düşərgəyə yeni qoşulublar. Denilson ümumiyyətlə bir-iki məşqə çıxmışdı. Fikrimcə, onlar zamanla daha faydalı olacaqlar.
- "Neftçi"nin tam hazır olması üçün nə qədər vaxt lazıımdır ki?
- Mümkün qədər tez forma yığmağımız üçün daha çox çalışmağımız lazımdır. Biz bunun üçün əlimizdən gələni edirik. Taktiki cəhətdən də çox işləməliyik.
- Azarkeşlərin boykot qərarına münasibətiniz necədir?
- Bu, bizi məyus edir. Bir kapitan kimi tribunalarda daha çox azarkeşimizin olmasını istərdim.
- Ötən mövsüm komanda yeni idi, gənclər çox idi, uğursuzluq bununla izah olunurd. Bu mövsüm necə olacaq?
- Bu mövsüm daha yaxşı çıxış etməliyik. Mümkün qədər çox xal yığıb, üst pillələrdə qərarlaşmalıyıq, altıncı yerdə yox.
- Bir müddət öncə sizin Türkiyənin "Antalyaspor" klubuna keçəcəyinizə dair xəbərlər yayılmışdı...
- Belə xəbərləri şərh edə bilmərəm. Çünki "Neftçi"yə mənim üçün rəsmi müraciət edən olmayıb. Çox adam deyir ki, Araz xaricdə oynamalıdır. Amma mən "Neftçi"ni belə vəziyyətdə atıb getmək istəmirəm.
