Məhəmməd Mirzəbəyov: İndi 6 xalımız olmalı idi
"Qəbələ"nin müdafiəçisi Məhəmməd Mirzəbəyov Premyer Liqanın 2-ci turu çərçivəsində "İnter"ə qarşı keçirdikləri oyundan sonra azerisport.az saytının suallarını cavablandırıb. Azerisport.az saytına açıqlamasında o, bunları söyləyib:
- Qolsuz heç-heçə barədə nə deyə bilərsiniz?
- Fikrimcə, taktiki cəhətdən rəqibdən daha üstün idik. Bunun da sayəsində onlara qol vəziyyəti yaratmağa imkan vermədik. Bizə gəlincə, qol vəziyyətlərimiz oldu. Sadəcə, onlardan yararlana bilmədik.
- Bu, nə ilə bağlıdır?
- Deyə bilmərəm.
- Ola bilər ki, əsas heyətin bir neçə üzvünün meydanda olmamasının təsiri idi?
- Belə deməzdim. Pis oynamadıq, şanslarımız da var idi. Penalti barədə heç nə danışmaq istəmirəm. Çünki futbolda belə hallar olur.
- İki turdan sonra 4 xalınız var...
- 6 xalımız olmalı idi.
- "Qəbələ" Avropa Liqasında və çempionatda fərqli heyətlərlə oynayır. Bunun çoxmu təsiri olur?
- Elə də yox. Sadəcə, Premyer Liqa oyunlarında yerli futbolçuların sayı çox olur. Yaxşı oynamağa və bizə göstərilən etimadı doğrultmağa çalışırıq.
- Qarşıda Sloveniya "Maribor"u ilə avrokubok matçı var...
- Çətin oyun olacaq. Avroliqa tamamilə fərqli səviyyədir. Daha çox çalışmalıyıq.
- Bu dəfə rəqibinizi "Bakcell Arena"da yox, "Dalğa Arena"da qəbul edəcəksiniz. Bunun komandanıza təsiri olacaq?
- Meydança yaxşı olsa, heç bir problem olmayacaq. Biz "Bakcell Arena"ya öyrəşmişdik. "Dalğa Arena"ya da alışa bilərik.
