Roman Qriqorçuk: Klub rəhbərliyindən dəstək gözləyirik

"Qəbələ"nin baş məşqçisi Roman Qriqorçuk bu gün azarkeşlərlə görüşündən danışıb. Azerisport.az xəbər verir ki, ukraynalı mütəxəssis bunları söyləyib:

"Azarkeşlərlə görüş xoş məqamdır. Bizimlə nə qədər çox şəkil çəkdirmək istəyirlərsə, deməli, bir o qədər sevgiləri var. Belə görüşlər çox vacibdir. Bu, futbolda atmosferi daha da yaxşılaşdırır.

Avropa Liqasındakı rəqibimiz - Sloveniya "Maribor"u çox sürətli hücumlar qurur. Bunun da sayəsində futbolçular rəqib qapısına çox tez yaxınlaşırlar. Eşitmişəm ki, bu rəqiblə qarşılaşacağımız "Dalğa Arena"ya gəlmək çox adam üçün çətin olacaq. Amma bizə azarkeşlərin dəstəyi lazımdır. Klub rəhbərliyindən dəstək gözləyirik. İnanıram ki, onlar bu problemi yoluna qoyacaqlar. "Qəbələ"yə güclü dəstək olanda, daha da yaxşı oynayır.

Rəşad Sadiqovun durumuna gəlincə, onun ilk oyunda meydana çıxması real deyil. Bəlkə də cavab oyununda meydana çıxa bilər. Sadiqov elə ilk oyundan etibarən oynamağa hazır olduğunu desə də, biz onun sağlamlığı ilə risk edə bilmərik".