Səlahət Ağayev: Belə havada qolsuz heç-heçə normaldır
"İnter"in qapıçısı Səlahət Ağayev Premyer Liqanın 2-ci turu çərçivəsində "Qəbələ"yə qarşı keçirdikləri oyundan (0:0) sonra azerisport.az saytının suallarını cavablandırıb:
- Oyun barədə nə deyə bilərsiniz?
- Hava çox isti idi. Belə havada qolsuz heç-heçə tamamilə normaldır. Fikrimcə, nəticə meydanda baş verənləri özündə əks etdirdi.
- Hakimin penalti qərarı doğru idi?
- Qarşımda bir neçə oyunçu durmuşdu, dəqiq görmürdüm. Yan xətt hakimi də mənə dedi ki, qayda pozuntusu var idi.
- Keçmiş komanda yoldaşınız Nika Kvekveskirinin penalti zərbəsini haraya vuracağını bildiyiniz üçün onu dəf edə bildiniz?
- Bunu demək çətindir. Penalti 99 faiz qol deməkdir, qapıçının onu qaytarmaq şansı 1 faiz olur. Onun zərbəni haraya vuracağını bilmirdim. Sadəcə, uzandım, qaytardım.
- Öncə "Qarabağ" üzərində qələbə, indi "Qəbələ" ilə heç-heçə. Start uğurlu sayıla bilər?
- Bəli. Ötən mövsümlə müqayisədə işlərimiz indi yaxşı gedir.
- Kamran Ağayev indi formada deyil. Bunu nəzərə alsaq, DÇ-2018-in seçmə mərhələsi çərçivəsində San Marinoya qarşı oyunda sizin start heyətdə yer alacağınızı söyləmək olar?
- Buna baş məşqçi qərar verəcək.
- Bəs siz onun yerində olsaydınız, hansı qərarı verərdiniz?
- Bir penalti qaytarmaqla millinin start heyətinə düşmürlər. Hər şey o qədər sadə deyil. Amma milliyə dəvət almaq üçün əlimdən gələni edirəm.
- Artıq ikinci turun oyunları keçirilir, Robert Prosineçki hələ də yoxdur. San Marino ilə oyuna dəvət alacaq futbolçuların siyahısı nə dərəcədə ədalətli ola bilər?
- Bunu mən deyə bilmərəm. Baş məşqçinin köməkçiləri var. Özü gəlməsə də, köməkçiləri stadionlara gəlib, oyunları izləyirlər.
