Bədavi Hüseynov: Qöteborq azarkeşlərimizin düşündüyü qədər zəif rəqib deyil

"Qarabağ"ın müdafiəçisi Bədavi Hüseynovun azerisport.az saytına müsahibəsi

- "Sumqayıt"la bu gün baş tutacaq 2-ci turun oyununa nə dərəcədə hazırsınız?
- "Sumqayıt" hücum etməkdən qorxmayan komandadır. Onlar ilk turda "Zirə"yə qalib gəldilər. Buna görə də biz bu görüşə ciddi hazırlaşmışıq. Biz də mövsümə pis başlamışıq. "İnter"ə məğlub olduq. Bu oyunu yorğunluq fonunda keçirdik. Həm də süni örtüklü meydanda mübarizə aparırdıq. Rəqib yaxşı oynadı, daim hücum qurmağa çalışırdılar. Amma bu uğursuzluğu unudub, qarşıdakı oyunlarda müsbət nəticələr qazanmağa köklənməliyik. Bizi vacib oyunlar gözləyir.

- "Qarabağ"ın Avroliqanın pley-off mərhələsində bəxtinin gətirdiyini demək olar?
- Bu mərhələdə zəif rəqib olmur. Hər bir komanda qrup mərhələsində oynamağa layiqdir. İsveç "Qöteborq"u barədə əvvəllər çox eşitməmişdim. Amma bəzi azarkeşlərimizin düşündüyü qədər zəif komanda deyilmiş.

- Hər halda daha güclü klublarla da düşə bilərdiniz...
- Potensial rəqiblər arasında ciddi bir fərq yox idi. Həm də bizim üçün vacib olan öz oyunumuzu sərgiləməkdir.

- "Qöteborq" barədə nə dərəcədə məlumatınız var?
- Bu mərhələyə qədər üç güclü komandanı yolundan kənarlaşdırıb. Bu komanda xüsusilə səfər oyunlarında çox yaxşı təsir bağışlayır. Ona görə də nəinki səfər, ev oyununa da çox ciddi hazırlaşmalıyıq.

- İlk oyunu səfərdə keçirməyiniz sizin üçün nə dərəcədə önəmlidir?
- Fərqi yoxdur. Əsas məsələ hər iki oyunda yaxşı çıxış etməkdir.

- "Qarabağ"ın ÇL-in qrupunda oynaması üçün nə çatmadı?
- Bilmirəm. Prinsipcə, Çexiya "Viktoriya"sına oyun planında uduzmadıq. Öz futbolumuzu oynadıq, layiqli çıxış etdik, amma yenə də mərhələ adlaya bilmədik. Amma biz buna görə ruhdan düşmürük. İnanırıq ki, gələcəkdə hər şey daha da yaxşı olacaq. Hədəfimizə çatmaq üçün fasiləsiz çalışırıq.