Elvin Bədəlov: Neftçi ilk üçlüyə düşmək istəyir
"Neftçi"nin müdafiəçisi Elvin Bədəlovun azerisport.az saytına müsahibəsi
- Premyer Liqanın ilk turunda qələbə qazandığınız (2:0) AZAL-la oyun barədə nə deyə bilərsiniz?
- Çətin matç oldu. Birinci oyunlar həmişə ağır keçir. Həm də hava çox isti idi. Süni örtükdə oynamağımız da əlavə çətinlik yaradırdı. Buna baxmayaraq, toparlana və qələbə qazana bildik. Baxmayaraq ki, ilk yarıda bir oyunçumuz meydandan da qovulmuşdu.
- Fasilədən sonra nə dəyişdi?
- Birinci hissədə bizə isti hava çox mane oldu. Həm buna, həm də süni örtüklü meydana alışmağa vaxt lazım idi. Çünki mövsümə təbii örtüklü meydançalarda hazırlaşmışdıq. Birinci hissədə bütün bunlara görə çətinlik çəkdik. Amma fasilədən sonra şəraitə bir qədər uyğunlaşdıq və istəyimizə çatdıq.
- Belə çıxır ki, matçın başlama saatı uyğun vaxta təyin edilməmişdi?
- Saat 6-da oynamaq mümkünsüzdü. Oyunu saat 20:00-a salsaydılar, daha yaxşı olardı. Amma bizim belə bir qərar vemək şansımız yoxdur. Təqvimi belə qurmuşdular, biz də peşəkar futbolçu kimi çıxıb öz işimizi gördük.
- Mövsümün ilk qolunu siz vurdunuz...
- Buna görə çox şadam. Künc zərbəsindən gələn topu qapıya göndərdim. Bu, ev tapşırığı idi. Hər şey çox yaxşı alındı.
- Müdafiə xəttinizdə iki yeni oyunçu var. Anlaşma baxımından problem var?
- Toplanışda, yoxlama oyunlarında bir-birimizə uyğunlaşmağa çalışmışıq. Meydana çıxan hər bir futbolçu komandanın uğur qazanması üçün çalışır.
- "Neftçi"nin yeni mövsümdə hədəfi nədir?
- Mükafatçılar sırasında yer almaq istəyirik. Buna nail olsaq, əla olar.
