Filip Ozobiç: Qəbələnin hədəfi Avroliqanın qrup mərhələsində oynamaqdır

"Qəbələ"nin yarımmüdafiəçisi Filip Ozobiç Avropa Liqasının pley-off mərhələsi çərçivəsində Sloveniya "Maribor"una qarşı keçirəcəkləri oyunlarla bağlı fikirlərini bölüşüb. Azerisport.az xəbər verir ki, o, öncə bunları söyləyib:

"Bütövlükdə, püşkdən razı qaldım. "Maribor" yaxşı komandadır. Amma hər halda bu, İngiltərə "Vest Hem"i ilə düşməkdən pis deyil".

Xorvatiyalı futbolçunun sözlərinə görə, onun komandası hazırda yaxşı formadadır: "Hədəfimiz qrup mərhələsinə vəsiqə qazanmaqdır. Buna nail olacaq gücdəyik. Baxmayaraq ki, Sloveniya klubunun da avrokuboklarda böyük təcrübəsi var. Amma biz Fransa "Lill"ini keçməklə belə rəqiblərə qalib gələ bildiyimizi göstərdik. Fikrimcə, yenə uğur qazanmaq üçün yaxşı şansımız var".

Ozobiç bəyan edib ki, hələ də komandasının ev oyunlarını keçirdiyi doğma arenada olmayıb: "Hələ Qəbələdə olmamışam. Çünki məşqlərimiz, oyunlarımız hamısı Bakıda baş tutur. Amma təbii ki, çempionatdakı qalan ev oyunlarımızı Qəbələdə keçirəcəyik. Çoxlu azarkeşimiz var. Bunu "Lill" ilə oyunda da görmək mümkün idi. Hələ fanatlarımızın hamısı həmin oyunda iştirak etmirdi. Çünki Qəbələ ilə Bakını üç saatlıq yol ayırır".

Yarımmüdafiəçi "Lill"ə vurduğu qolu da xatırlayıb: "Hə, həmin zərbə anında doğrudan da 25 metrdən qol vurmaq məndə əla alındı. Qapıçının həmin zərbəni qaytarmaq şansı yox idi. "Lill" favorit sayılsa da, biz uğura daha layiq olduğumuzu göstərdik".