FİFA yığmamızın xərclərini öz üzərinə götürdü
Futzal üzrə Azərbaycan yığması sentyabrın 10-da Kolumbiyada start götürəcək dünya çempionatına hazırlığı davam etdirir. Azerisport.az xəbər verir ki, millimizin sözügedən ölkəyə nə vaxt yollanacağı hələ dəqiqləşməyib.
Məsələ burasındadı ki, mundialda iştirak edəcək komandaların bütün səfər xərcləri FİFA tərəfindən ödəniləcək. Amma təşkilatçılar çempionata qatılacaq 24 komandanın hər birinin yalnız 21 nəfərlik nümayəndə heyətinin xərclərini öz üzərinə götürüb. 21 nəfərdən artıq heyətlə təmsil olunan komandalar əlavə xərcləri özləri ödəməli olacaqlar. Bu üzdən AFFA da hazırda FİFA-nın qərarını gözləyir.
Hazırda yalnız o məlumdur ki, mundial iştirakçılarının hər biri ilk oyunundan ən azı 4 gün əvvəl Kolumbiyada olmalıdır. Millimizin ilk matçı sentyabrın 12-də Mərakeşə qarşı olacaq.
