Serjinyo: Kəpəz Qəbələdən qorxmur

"Kəpəz"ın yarımmüdafiəçisi Serjinyonun azerisport.az saytına müsahibəsi

- Premyer Liqanın 1-ci turunun "Qəbələ" ilə səfər oyununa hazırsınız?
- Əlbəttə! Yaxşı məşq etmişik, komandada əla atmosfer var. Səbrsizliklə oyunun startını gözləyirik.

- Bəs bu rəqiblə oyundan nə gözləyirsiniz?
- Çətin oyun olacaq. Rəqibin əla heyəti var. Amma biz bu görüşü uğurla başa vurmaq istəyirik. Sonadək mübarizə aparacağıq.

- Avrokuboklardakı çıxışınız yeni mövsümdə sizə əlavə güc verib, ya mübarizəni erkən dayandırmağınız mənfi təsir edib?
- Böyük ehtimalla, birinci variant daha üstündür. Avroliqadakı çıxışımız bizə böyük fayda verdi. "Qəbələ"yə qarşı yaxşı oynamağa çalışacağıq. Buna qadir olduğumuza inanıram.

- "Kəpəz" ilk oyununu Bakıda keçirəcək...
- Bakı yaşamaq üçün gözəl şəhərdir. Şəhər çox xoşuma gəlib. Artıq buraya uyğunlaşmışam.

- Bəs "Kəpəz"in ev oyunlarını keçirdiyi Gəncə şəhərində, doğma stadionunda olmusan?
- Xeyr, ancaq videolarda görmüşəm. Əlbəttə, tezliklə öz gözlərimlə də oraları görmək istəyirəm.

- "Kəpəz"dən fərqli, "Qəbələ" avrokuboklarda çıxışını davam etdirir. Onlar son olaraq "Lill" (Fransa) kimi rəqibə qalib gəliblər. Bu, sizi qorxutmur?
- Xeyr, "Qəbələ"dən qorxmuruq. Çünki bizim də yaxşı komandamız var. Rəqibə hörmət etsək də, qorxu yoxdur.

- Elnur Cəfərovun Portuqaliaynın "Tondela" klubundakı legioner karyerası demək olar ki, başlamamış bitdi. Futbolçu baş məşqçi Armando Petitlə aralarındakı münaqişə səbəbindən klubdan ayrıldığını deyir. Siz bu hadisəni necə qarşıladınız?
- Orada əslində nə baş verdiyini bilmirəm. Onun qısa zaman kəsiyində komandanı tərk etməsi mənə çox qəribə gəldi. Bircə onu deyə bilərəm ki, Portuqaliyada müsəlmanlara qarşı çox yaxşımünasibət var. Hər kəs digər dinlərin inanclarından xəbərdardır. Belə məsələlərə də ayıq-sayıq yanaşırlar.