Vitali Vernidub: Ederə qarşı oynamaq bizim üçün qiymətsiz təcrübə oldu

"Qəbələ"nin müdafiəçisi Vitali Vernidubun azerisport.az saytına müsahibəsi

- Premyer Liqadakı ilk matçınız "Kəpəz"ə qarşıdır. Bu oyundan nə gözləyirsiniz?
- Çempionata uğurlu nəticə ilə başlamaq istəyirik. Rəqibimiz yaxşı komandadır. Onlara hörmətlə yanaşırıq.

- Avroliqanın qrup mərhələsinə çıxmağınıza cəmi bir addım qalıb. Pley-offda Sloveniya "Maribor"u ilə düşməklə bəxtinizin gətirdiyini demək olar?
- Püşkün nəticəsindən asılı olmayaraq, biz qrup mərhələsinə vəsiqə qazanmaq istəyirik və bunun üçün öz futbolumuzu nümayiş etdirəcəyik.

- Razısınız ki, "Qəbələ" "Maribor"u da keçməyə borcludur?
- "Maribor" çox yaxşı, güclü komandadır. Bu mərhələdə zəif rəqib olmur. Buna görə də "Maribor"la oyunlarımızın asan keçməyəcəyini demək olar. Onlar artıq bizim əvvəlki oyunlarımızı izləyiblər və diqqətlə analiz edəcəklər. Biz də bu komanda ilə oyunlara ciddi hazırlaşacağıq.

- Amma Türkiyənin "Fənərbaxça" klubu ilə də qarşılaşa bilərdiniz...
- Dediyim kimi, bu mərhələdə bütün komandalar güclüdür. Ona görə də heç bir klub arasında fərq qoymaq, müqayisə aparmaq istəməzdim. Bu mərhələdə hər bir komandadan sürpriz gözləmək olar. Lakin çox ümid edirəm ki, "Maribor" səddini də keçəcəyik.

- "Maribor" yəqin ki, ilk oyunda sizə qarşı ehtiyatlı oynamağa çalışacaq...
- Hazırda tam olaraq "Kəpəz"lə oyuna köklənmişik. Ona görə də "Maribor"la matçların necə keçəcəyinə dair fikir yürütmək mənə çətindir. Bircə onu deyə bilərəm ki, hər bir rəqibə hörmətlə yanaşmaq lazımdır.

- "Lill"ə oyun ərəfəsində Fransa klubunun portuqaliyalı ulduzu Ederdən çox ehtiyatla danışılırdı. Avropa çempionuna qarşı oynamaq necə idi?
- Şübhəsiz ki, bu, çox yaxşı təcrübə oldu. Bunu həm müdafiəçilərimiz, həm də bütövlükdə komandamıza aid etmək olar. Eder çox texnikalı oyunçudur, ikinci mərtəbədə də əla oynayır. Yüksək səviyyəli hücumçudur. Ona qarşı oynamağımız bizə gələcək oyunlarda da çox kömək edəcək. Qiymətsiz təcrübə qazanmış olduq.