Qöteborqun baş məşqçisi də Qarabağla düşmələrinə sevinir

İsveçin "Qöteborq" klubunun baş məşqçisi Yorgen Lennartson Avropa Liqasının pley-off mərhələsində "Qarabağ"a rəqib olmalarından danışıb. Azerisport.az xəbər verir ki, o, bunları söyləyib:

"Mümkün variantlar arasında bizə ən uzaq səfər qismət oldu. "Qarabağ"ın heyətində bir neçə legioner futbolçu çıxış edir. Aralarında ispaniyalı, braziliyalı oyunçular var. Çox internasional komandadır. Amma biz hələ onların oyununu görməmişik. Buna görə də konkret nəsə demək çətindir. Çempionlar Liqasında Çexiya "Viktoriya"sı ilə iki heç-heçə etsələr də, səfər qolu sayəsində mərhələ adlaya bilməyiblər. Uzun yolçuluğa gəlincə, Xəzər dənizi sahillərinə səyahət Ukrayna "Şaxtyor"u ilə düşməkdən yaxşıdır. Çünki Donetsk təmsilçisinin Çempionlar Liqasında böyük təcrübəsi var. Qarşıda bizi iki vacib oyun gözləyir. Yaxşı şansımız var".