Rəşad Sadiqov: Avroliqanın qrupuna vəsiqə qazanmaq üçün əlimizdən gələni edəcəyik

"Qəbələ"nin kapitanı Rəşad Sadiqov Avropa Liqasının üçüncü təsnifat mərhələsi çərçivəsində Fransanın "Lill" klubuna qarşı keçirdikləri cavab oyunundan (1:0, ilk oyun 1:1) sonra jurnalistlərin suallarını cavablandırıb. Azerisport.az sizi həmin açıqlamalarla tanış edir.

- Matç barədə nə deyə bilərsiniz?
- Rəqib səviyyəli komanda idi. Elə Fransa klubunun adı bizə motivasiya üçün bəs idi. Fransadan yaxşı nəticə ilə qayıtmışdıq. Burada da yaxşı oynadıq və layiqli qələbə qazandıq.

- Bu, sensasiyadır?
- Sensasiya bir oyunda ola bilər. Amma biz onlardan hər iki oyunda üstün olduq. "Qəbələ" indi yaxşı formadadır. Avroliqanın qrup mərhələsinə vəsiqə qazanmaq üçün də əlimizdən gələni edəcəyik. Bizi sevən, hətta sevməyən hər kəsi də sevindirmək istəyirik.

- Bu oyun daha çətin oldu, ya səfərdəki görüş?
- Ən çox çətinliyi səfərdəki matçın ikinci yarısında çəkdik. Bunu da uzun yol yorğunluğu ilə əlaqələndirərdim.

- Bu oyunun 80-ci dəqiqəsindən sonra tempi aşağı salmağınız da yorğunluqdan irəli gəlirdi?
- Hesabda üstün idik. Rəqib isə bizi sıxışdırmağa çalışırdı. Deyərdim ki, öz cərimə meydançamıza sıxışmağa rəqib bizi məcbur etdi. Onlar son dəqiqələrdə artıq dörd hücumçu ilə oynayırdılar. Amma biz də əks-hücumlar qururduq. Həm də hava isti idi.

- Potensial rəqiblər artıq bəllidir. Hansı ilə qarşılaşmaq istərdiniz?
- Bu mərhələnin püşkü atılanda düşünürdüm ki, təki "Lill" ilə düşməyək. Amma sonda elə bu komandaya rəqib olduq. Ona görə də indi bizim üçün hansı komanda ilə düşməyin fərqi yoxdur. "Lill"i keçmişiksə, növbəti rəqibə də qalib gəlməyə çalışacağıq.