Qriqorçuk: Lill üzərindəki qələbəni 20 il də keçsə, unutmayacağıq
Avropa Liqasının 3-cü təsnifat mərhələsinin cavab qarşılaşması çərçivəsində Fransa "Lill"ini 1:0 hesabıyla məğlub edərək, yarışdan kənarlaşdıran "Qəbələ"nin baş məşqçisi Roman Qriqorçuk mətbuat konfransı keçirib. Azerisport.az sizi ukraynalı mütəxəssisin fikirləri ilə tanış edir:
- Siz Azərbaycan komandası ilə Avropanın böyük beşlik ölkələrinin təmsilçilərinə qalib gələn ilk mütəxəssis oldunuz...
- Bu oyun həqiqətən xüsusi idi. Cavid Hüseynovu çox sevirik. Qələbəni ona həsr edirik. İkinci məqam stadiondakı atmosferin olduqca isti olduğunu gördüm. Sanki hər azarkeşin gözünü görürdüm. Bu, tarixi hadisədi. Hətta 20 ildən sonra da bu qələbəni unutmayacağıq. Sevincimi gizlətməyə əsas görmürdüm. Bu, Azərbaycan futbolunun imicinə müsbət təsir göstərir.
- Fransa futbol tarixində Azərbaycan yığması özünəməxsus rekordçudu. Fransızlar tarixinin ən böyükhesablı qələbəsi məhz yığmamız üzərində baş verib. Bu gün qisas baş tutdu.
- Açığı, bundan xəbərsiz idim. Ancaq qisas baş tutubsa, lap əla!
- Bu gün "Qəbələ" fantastik futbol sərgilədi. Amma ölkə çempionatındakı limiti nəzərə alsaq, bu heyətlə çıxış edə bilməyəcəksiniz. Sizə elə gəlmir ki, limitə yenidən baxılmalıdı?
- Həmişə bir fikirdə olmuşam: limit ümumiyyətlə, olmamalıdı. İnanın, belədə, hətta klublarımız qənaət də edəcək. Meydanda ən güclülər, ən layiqlilər olmalıdı. Seçim süniləşməməlidi, təbii olmalıdı.
- Bu oyundan sonra yata biləcəksiniz?
- Çətin olacaq. Heç yatmağa çalışmayacağam da. Xoş stress də olsa, yenə yatmayacağam.
- Cəmi bir əvəzetməyə əl atdınız. O da məcburiyyətdən. Futbolçularınızın hər birindən razı idiniz?
- Hətta deyərdim ki, işlək mexanizmdən tam razı idim. Əvəzetmə bu mexanizmin işləməsinə mənfi təsir göstərə bilərdi.
- Hakimlə niyə mübahisəyə girişmişdiniz?
- Bu cür hal yaşandı, amma ümumilikdə idarəetmədən razı qaldım. Deyərdim "Lill"ə qarşı ilk oyundakı polşalı hakimlər briqadasından daha çox narazı qalmışdım. Bu gün isə o qədər də narazı deyildim.
