Zaur Svanadze: Qarabağın Viktoriyanı keçməməsi ədalətsizlikdir
"İnter"in baş məşqçisi Zaur Svanadzenin azerisport.az saytına müsahibəsi
- "İnter" yeni mövsümə hazırdır?
- Yeni mövsümə hazırlığımızla bağlı ancaq xoş sözlər deyə bilərəm. Amma mövsümə nə dərəcədə hazır olduğumuzu oyunlar göstərəcək. Bütövlükdə, pis hazırlaşmamışıq. Türkiyədə daha çox vaxt keçirməyimizi istərdim, amma alınmadı.
- Bundan sonra transfer olmayacaq?
- Böyük ehtimalla olmayacaq. Yerli uşaqlardan razıyam. Amma daha bir-iki legioner almağımızı istərdim.
- Niyə alınmadı ki?
- Maliyyə vəziyyətimiz imkan vermədi.
- Bəlkə də "İnter" tarixi ərzində bu qədər az legionerin ümidinə qalmamışdı...
- Artıq dörd ildir bu klubdayam. Doğrudan da bu qədər az legionerlə qalmamışdıq. İndi cəmi üç əcnəbi oyunçumuz var.
- Qarşınıza hansı vəzifə qoyulub?
- Avrokuboklara vəsiqə qazanmağa çalışacağıq. Bunun öhdəsindən nə dərəcədə gələcəyimizi zaman göstərəcək. Yerli futbolçularımız çoxdur. Bu, onların özlərini göstərməsi üçün əla şansdır.
- İlk oyununuz son çempiona - "Qarabağ"a qarşı olacaq...
- Daha sonra da "Qəbələ" ilə qarşılaşacağıq. Püşk bizim üçün o qədər də münasib olmadı. Bu oyunlarda nəticə qazanmaq üçün bütün bacarığımızı göstərməliyik.
- Bəlkə də əksində, bu, sizin üçün bir şansdır. Çünki Ağdam klubu ÇL-də mübarizəni dayandırdığı üçün psixoloji cəhətdən yaxşı vəziyyətdə deyil...
- Ağdam klubunda peşəkar futbolçular cəmləşib. İndiki vəziyyət onların bizə qarşı öz oyunlarını göstərmələrinə heç bir təsir göstərə bilməz. Həm də bu komandanın iki heyəti var. "Qarabağ"ın Çexiya "Viktoriya"sını keçə bilməməsi ədalətsiz nəticə oldu. Bu qədər üstün oyun nümayiş etdirib, qol vəziyyəti yaradıb, qələbə qazana bilməmək üzücü oldu. "Qarabağ" bir daha göstərdi ki, ən yaxşı komandadır.
- "Viktoriya" ilə oyun sizin üçün "Qarabağ"a qalib gəlmək üçün nümunə sayıla bilər?
- Bizim öz oyun üslubumuz var. Tamamilə fərqli oynayırıq. Həm də çexlərin bəxti gətirdi. Qapıya bircə zərbə vurdular, mərhələ keçdilər. Komandamın elə oynamasını istəməzdim. Biz futbol oynamaq istəyirik.
