Samir Əliyev: Yenidən iki klubumuzun qrup mərhələsində oynaması yaxşı olardı

Azərbaycan yığmasının sabiq hücumçusu Samir Əliyevin azerisport.az saytına müsahibəsi

- "Qarabağ"ın ÇL-də mübarizəni dayandırmasına sizin münasibətiniz necə oldu?
- "Qarabağ" ÇL-in pley-offuna çıxmaq üçün əla şansa malik idi. Hər şey də xeyrimizə gedirdi. O qədər qol epizodu yaratdılar. Hesabda üstün idilər. Rəqib heç nə edə bilmirdi. Hər şeyi cərimə meydançasına edilən adi bir asma korladı.

- Əksəriyyət Qurban Qurbanovu uğursuz əvəzetmələrdə günahlandırır. Siz də bununla razısınız?
- Qurbanov ən yaxşı məşqçilərimizdən biridir. Öz işinin bilənidir. O, bu komandanın uğurları üçün çox iş görüb. "Viktoriya" ilə oyunda da kimin nə vaxt oynayacağını ondan yaxşı heç kim bilə bilməzdi. Çexiya çempionu həmin qolu vurmasaydı, indi heç kim onu tənqid etməzdi, vəziyyət əksinə idi.

- Amma qonaqlar məhz Elvin Yunuszadə ilə Əl-Jadeyuinin meydana çıxmasından sonra qol vurdular...
- Uğursuzluqdan sonra baş məşqçiyə tənqidlər normaldır. Qurbanovun oyundan sonrakı açıqlamalarını da oxudum. Bəli, müdafiədə səhv oldu. Belə oyunlarda rəqiblər səhvi bağışlamırlar. Amma mən bu qədər tənqidin əleyhinəyəm. Çünki bu komanda hələ avrokuboklarda mübarizəni davam etdirir. "Qarabağ"ı dəstəkləmək lazımdır. Bu vəziyyətdən çıxmağa kömək etməliyik. Bəli, hamımız məyusuq. Amma komandanın Avroliqanın qrup mərhələsində oynaması üçün dəstək olmaq vacibdir.

- Sizə elə gəlmir ki, "Qarabağ"a bu uğursuzluğuna səbəb çempionatımızın zəifləməsidi?
- Çexiya ÇL-də iki klubla təmsil olunur. Biz reytinqdə Azərbaycandan xeyli öndə olan ölkənin təmslçisinə qarşı mübarizə aparırdıq. Təbii ki, biz də güclü çempionatımızın olmasını istərdik. Amma hər şeyi çempionatın səviyyəsinə bağlamaq da düz deyil. Bu oyunda çempionumuzun sadəcə, bəxti gətirmədi.

- "Qəbələ"nin Fransanın "Lill" klubu ilə oyunundan nə gözləyirsiniz?
- Fransızları keçmək çətin olacaq. Baxmayaraq ki, komandamız səfərdən 1:1 hesablı sərfəli nəticə ilə qayıdıb. Səfərdə belə bir rəqiblə heç-heçənin özü də bir uğurdur. Nəzərə almalıyıq ki, bizim futbol Fransa futbolu ilə bir səviyyədə deyil. Amma şansımız var. Yenidən iki klubumuzun Avroliqanın qrup mərhələsində oynaması yaxşı olardı.