Samir Abasov: Sumqayıt yeni mövsümə 60-70 faiz hazırdır
"Sumqayıt"ın baş məşqçisi Samir Abasovun azerisport.az saytına müsahibəsi
- Mövsümə necə hazırlaşa bilmisiniz?
- Hazırlıq pis keçməyib. Toplanışa Sumqayıtda başladıq. Sonra Türkiyədə iki həftəlik hazırlıq keçdik. Yoxlama oyunlarında qüvvəmizi sınadıq. Bütövlükdə, pis hazırlaşmadığımızı deyə bilərəm.
- Komanda yeni mövsümə nə nədərəcədə hazırdır?
- 100 faiz hazır olduğumuzu desəm, absurd olar. Hələ o vəziyyətdə deyilik. Çünki yoxlama oyunları ilə rəsmi matçlar tamamilə fərqli olur. Yoxlama oyunlarında yaxşı təsir bağışlayan komandaların, futbolçuların rəsmi görüşlərdə onu təkrarlaya bilməməsi halları az deyil. Təxminən 60-70% hazırıq. Komandamız demək olar ki, yenilənib. Gənclər daha çoxdur. Oyunumuzda temp artıb. 3-4-cü tura kimi formada olacağımızı düşünürəm.
- Elə isə mövsümün startındakı "Zirə" ilə oyundan sizdən nə gözləyək?
- Mövsümün startı bizim üçün çətin olacaq. Öncə ötən mövsümün gümüş medalçısı, sonra çempionu, ardından bürünc medalçısı ilə qarşılaşacağıq. İstənilən halda hər bir rəqiblə oynamağımız lazımdır. "Zirə" də Türkiyədə bizimlə yanaşı hazırlıq keçirdi. Onların da yaxşı yeni transferləri var. Yaxşı komandadır. Amma biz hər oyunda yaxşı nəticə qazanmaq üçün mübarizə aparacağıq.
- "Sumqayıt"ı bu mövsüm daha çətin sınaq gözlədiyini söyləmək olar?
- Çempionatımız onsuz da çətin keçir. Amma biz özümüzü göstərə bilərik. Bu, rəhbərlik üçün də bir stimul ola bilər.
- Yeni transferləriniz uğurlu çıxış etməyə imkan verəcək?
- Biz hələ o səviyyədə deyilik ki, istədiyimiz hər futbolçunu ala bilək. Gücümüz çatan transferlər etmişik. Premyer Liqa təcrübəsi olmayan futbolçularımız da var. Məhəmməd Qurbanovu geri qaytarmışıq. İstənilən halda, yaxşı kollektiv formalaşdırdığımızı düşüürəm. Bu uşaqlarla çalışmaq xoşdur.
- "Sumqayıt" güclənib?
- Çempionat göstərəcək. Amma oyunçu seçimimizə görə daha yaxşı vəziyyətdə olduğumuzu deyə bilərəm.
- Avrokuboklardakı təmsilçilərimizin - "Qarabağ"ın Çexiya "Viktoriya"sını, "Qəbələ"nin Fransa "Lill"ini keçmək şanslarını necə qiymətləndirərdiniz?
- Fikrimcə, hər iki komandamız mərhələ keçə bilər. Bunu kiməsə xoş gəlmək üçün demirəm. Sadəcə, buna inanıram. "Qarabağ"ın gücünü və imkanlarını qəbul etmək lazımdır. "Qəbələ"yə gəlincə, ilk oyunun nəticəsi yəqin ki, fransızları qəzəbləndirib. Amma Roman Qriqorçuk da çox yaxşı kollektiv formalaşdırıb. Baş məşqçiyə uzun müddət güvənməyin müsbət nəticəsini bu komandada da gördük. "Qəbələ"nin də fransızları keçmək şansı var.
