Lyubo Baranin: Qəbələyə Lill ilə ev oyunu daha çətin olacaq

"Qəbələ"nin sabiq müdafiəçisi Lyubo Baranin bu komandanın Avropa Liqasının üçüncü təsnifat mərhələsi çərçivəsində Fransanın "Lill" klubunu keçmək şanslarından danışıb. Azerisport.az saytına açıqlamasında o, bunları söyləyib:

"Fransada "Lill"ə qarşı belə oyun və 1:1 hesablı nəticə çox yaxşıdır. Unutmayaq ki, Fransa çempionatı Azərbaycan birinciliyindən üç baş üstündür. Hamı "Lill"i çətin və güclü rəqib kimi tanıyır. Amma mən həmişəki kimi, "Qəbələ"nin uğurlu çıxış edəcəyinə inanırdım. Bu komanda özü də güclü və komplektləşmiş heyətə malikdir".

"Yəqin ki, "Qəbələ"nin hədəfi ötən mövsüm qazandığı uğuru - Avroliqanın qrup mərhələsinə düşməyi təkrarlamaqdır. Klub qarşısına yüksək hədəflər qoyub".

Baraninin sözlərinə görə, "Lill" ilk oyunda "Qəbələ"ni ciddi qiymətləndirməyib: "Mümkündür ki, "Lill" qəbələliləri düzgün qiymətləndirməyib və bunun da cəzasını çəkdi. Amma bu, onların problemidir. Roman Qriqorçukun komandası çox yaxşı oynadı və sona kimi mübarizə apardı".

Lyubo cavab matçı ilə də bağlı fikirlərini dilə gətirib: "Bakıdakı oyun daha çətin olacaq. "Qəbələ"yə sakit oynamaq lazım gələcək. Çünki "Lill" bütün gücü ilə hücuma atılacaq. Ümid edirəm ki, Azərbaycan klubu növbəti mərhələyə vəsiqə qazana biləcək".

O, "Qəbələ"nin müdafiə xəttinin çıxışından da söz açıb: "Mənim dövrümdə komandanın çox güclü müdafiə xətti var idi. Yadınızdadırsa, biz o zaman çox az qol buraxırdıq. Əlbəttə, indi də komandanın yaxşı müdafiəsi var. Amma onda komandaya qol ötürmələri ilə yalnız mən komandaya kömək edirdim. İndi mənim kimi hücuma dəstək olan müdafiəçiləri yoxdur. Mən komandaya həm müdafiədə, həm də hücumda kömək edirdim. Amma istənilən halda "Qəbələ"nin müdafiəçilərinə hörmətlə yanaşıram".