Ramal Hüseynov: Çexlər Qarabağdan daha şanslıdırlar
"Qarabağ"ın sabiq yarımmüdafiəçisi Ramal Hüseynov Ağdam klubunun UEFA Çempionlar Liqasının üçüncü təsnifat mərhələsi çərçivəsində Çexiya "Viktoriya"sı ilə cavab oyununda uğur qazanmaq şanslarını dəyərləndirib. Azerisport.az saytına açıqlamasında o, bunları söyləyib:
"Səfər oyunundakı 0:0 "Qarabağ" üçün çox pis nəticədir. Bu, daha çox çexlərin Bakıdakı oyunda işini asanlaşdırmış oldu. Çünki onlar bir qol vuracaqları halda, "Qarabağ" ikisini vurmaq məcburiyyətində qalacaq. Amma futbolda hər şey mümkündür. Ola bilər ki, "Viktoriya" Bakıda normal oyun sərgiləyə bilməsin. Lakin ağdamlılar səfərdəki oyunda bu rəqibinə azlıqda qaldığı vaxtda da qol vura bilmədisə, çətin ki, evdə nəsə alınsın. Çexlərin mərhələ adlamaq şansı komandamızla müqayisədə daha çoxdur. "Qarabağ"a bu oyunda ancaq möcüzə kömək edə bilər. İstənilən halda "Qarabağ" bizim klubdur və ona hər cür dəstəyi göstərmək borcumuzdur. ÇL-in qrup mərhələsinə vəsiqə qazanmaq əsl möcüzə olar".
