Rəşad Abdullayev: 1-ci divizionda oynamaq istəmirəm, məşqçiliyə başlayıram

Azərbaycan yığmasının sabiq yarımmüdafiəçisi Rəşad Abdullayevin azerisport.az saytına müsahibəsi

- "Zirə"dən ayrıldıqdan sonra sizdən bir xəbər yoxdur...
- Klublardan dəvət gözləyirəm. Amma heç bir təklif almamışam. Belə davam etsə, karyeramı başa vuracağam. Özünüz də görürsünüz ki, Premyer Liqada da klub sayı azaldı. Gənc futbolçular özlərinə klub tapa bilmirsə, mənim haqda nə demək olar?

- Birinci divizionda oynamaq fikriniz yoxdur?
- Xeyr. Mənim yaxşı karyeram olub. Onu yaxşı şəkildə başa vurmalıyam. Həmişə iddialı klublarda oynamışam. Birinci divizion oynamaq istəmirəm.

- Elita klublarından təklif yoxdursa, onda karyeranızı bitirmək ehtimalınız yüksəkdir...
- Bundan sonra da təklif olmayacaqsa, karyerama son qoyacağam. Düzdür, özümdə daha bir il oynamağa güc hiss edirəm. Amma təklif olmayandan sonra nə etmək olar?

- Başqa heç bir planınız yoxdur?
- Azərbaycan yığmasında oynadığıma görə avtomatik olaraq C kateqoriyalı məşqçi lisenziyam var. Ona görə də B kateqoriyalı məşqçi lisenziyası almağa hazırlaşacağam.

- Bəs məşqçiliyə harada başlamaq istəyirsiniz?
- "Zirə"dən bu klubda çalışmaq təklifi almışam. Uşaq komandalarında işləməyə başlayacağam. Hər şey belə davam etsə, böyük ehtimalla elə "Zirə"də çalışacağam.

- Son dövrlər az qala bütün keçmiş futbolçular məşqçiliyə başlayıb...
- Mənim futboldankənar işlərim də var. Amma mən özümü məşqçilikdə də sınamaq istəyirəm. 16 il peşəkar futbolla məşğulam. Karyeramda elə məşqçilər görmüşəm ki, komandanı adicə psixoloji cəhətdən oyuna hazırlaya bilmirdilər, onlara kömək edirdim.