Tale Heydərov: 75 milyon avro büdcəyə malik Lilli keçməyin mükafatı çox olmalıdır
"Qəbələ"nin prezidenti Tale Heydərov Avropa Liqasının üçüncü təsnifat mərhələsi çərçivəsində Fransanın "Lill" klubuna qarşı keçirdikləri ilk oyundan (1:1) sonra fikirlərini bölüşüb. Azerisport.az xəbər verir ki, o, öncə bunları söyləyib:
- Səfərdə heç-heçə bizi qane etdi. Belə bir kluba qarşı Fransada bərabərə qalmaq pis nəticə deyil.
- Bu nəticəni gözləyirdiniz?
- Maksimum vəzifə yaxşı nəticə qazanmaq idi. Mərhələ adlasaq, kapitanımız Cavid Hüseynova həsr edəcəyik. Uşaqlar da yaxşı oyuna görə sağ olsunlar. Yaxşı mübarizə apardılar, sevindirdilər.
- Yeni transferlər olacaq?
- Hücumçu axtarırırıq. Bizə daha bir oyunçu lazımdır.
- Bakıdakı oyunlarda azarkeş fəallığı elə də yaxşı deyil. Cavab oyunundan nə gözləyirsiniz?
- Azarkeşləri cavab matçına cəlb etməyə çalışacağıq. Amma bu, təbii olmalıdır. Əminəm ki, bizim oyunumuzu televizordan çox adam izləyir. Amma onları stadionda görmək istərdik. Rəhbərlik, komanda bunun üçün əlindən gələni edir. Sadəcə, azarkeşlərin stadiona gəlib, komandanı dəstəkləməsi lazımdır. Şəxsən mən digər klublarımızın da oyunlarını izləmək üçün stadiona gedirəm.
- "Qarabağ"ın ÇL-in üçüncü təsnifat mərhələsində Çexiya "Viktoriya"sını keçmək şansını necə qiymətləndirirsiniz?
- "Qarabağ"a ilk növbədə adına və sərgilədiyi oyun üslubuna görə azarkeşlik edirəm. Bu komandaya hörmətim var. Klub doğru yoldadır. Səfərdəki qolsuz heç-heçə pis nəticə deyil.
- Cavab oyunundan nə gözləyirsiniz?
- Bu gün bizim bir qədər bəxtimiz də gətirdi. Cavab oyununda işimiz çətin olacaq. Biz cütün favoriti deyilik. Ona görə də qətiyyən arxayınlaşmaq olmaz.
- Digər matçlarla müqayisədə bu dəfə futbolçulara veriləcək mükafat daha çox ola bilərmi?
- Bəli, çoxdur. "Lill"in 75 milyon avroluq büdcəsi var. Belə bir rəqibi keçməyə görə mükafat yaxşı olmalıdır.
