Tomaş Qorjava: Qarabağ elə də inamlı çıxış etmədi

Çexiyanın "Viktoriya" klubunun yarımmüdafiəçisi Tomaş Qorjava Çempionlar Liqasının üçüncü təsnifat mərhələsi çərçivəsində "Qarabağ"a qarşı keçirdikləri ilk oyundan (0:0) sonra bəzi sualları cavablandırıb. Azerisport.az sizi həmin açıqlamalarla tanış edir.

- Qolsuz heç-heçəni necə şərh edərdiniz?
- Fikrimcə, heç-heçəyə baxmayaraq, şanslar elə əvvəlki kimi qalmaqdadır. Hər iki komandanın mərhələ adlamaq şansı bərabərdir.

- Baş məşqçi Roman Pivarnik qapıya az zərbə vurmağınızdan narazılığını dilə gətirdi. Onunla razısınız?
- Əlbəttə. Rəqib qapısına daha çox zərbə endirməliydik. Təəssüf ki, endirdiyimiz zərbələrin də əksəri qeyri-dəqiq oldu, top qapıya getmədi. Əslində, qol vurmaq üçün az imkanımız olmadı. Sadəcə, qol vurmağı bacarmadıq.

- Yoxlama oyunlarını da nəzərə alsaq, son dövrlər qol şanslarından yararlana bilməməyinizin səbəbi nədir?
- Bizim yaxşı hücumçularımız var. Fikrimcə, zamanla vəziyyət yaxşılaşacaq. Onların növbəti oyunlarda daha çox qol vuracağına inanıram.

- Deməli, komanda hələ oyun ritmini tuta bilməyib?
- Dəqiq. Artıq indidən nəticələrimizin yaxşı olması üçün isə daha yaxşı köklənməyimiz lazımdır.

- Səncə, "Qarabağ" Bakıda Plzendəkindən fərqli oyun sərgiləyəcək?
- Mümkündür ki, onlar doğma azarkeşlərinin gözü qarşısında daha inamlı oynasınlar. Amma bütövlükdə elə belə oynayacaqlarını düşünürəm. Bizim meydanımızda onlar elə də inamlı təsir bağışlamırdılar. Rəqibin bir sıra səhvləri də oldu, amma onlardan yararlana bilmədik.

- Bakıda daha çox hücum edəcəklərini gözləmək olar?
- Fikrimcə, elə olmayacaq. Mən "Qarabağ"dan hücum xarakterli oyun gözləmirəm.