Vüqar Nadirov: Qarabağa Viktoriya ilə oyunda kömək etməyə hazıram

"Qarabağ"ın hücumçusu Vüqar Nadirovun azerisport.az saytına müsahibəsi

- Çempionlar Liqasının üçüncü təsnifat mərhələsi çərçivəsində Çexiya "Viktoriya"sı ilə oyunlar üçün açıqlanan iştirak ərizəsinə sizin də adınız daxil edildi. Sizi bu gün baş tutacaq ilk oyunda görə biləcəyik?
- Təxminən 10 gündür məşq edirəm. Əlbəttə, "Viktoriya"ya qarşı oynamaq istərdim. Qurban Qurbanov şans versə, meydana çıxmağa, "Qarabağ"a kömək etməyə hazıram.

- Reynaldo və Mahir Mədətovla rəqabətdə özünüzü nə dərəcədə şanslı sayırsınız?
- Reynaldonun bacarığı hər kəsə yaxşı bəllidir. Mahir də gənc, perspektivli futbolçudur. Yaxşı gələcəyi var. Mən də özümü yaxşı tərəfdən göstərməyə çalışacağam. Bu rəqabət komandanın xeyrinə olacaq.

- "Qarabağ"ın iki il öncə "Viktoriya"ya qarşı keçirdiyi yoxlama oyunu yadınızdadır?
- Yadımdadır. Həmin vaxt rəqibin intizamlı komanda olduğu diqqətimizi çəkmişdi. İndi həmin heyət dəyişib. "Viktoriya" ciddi komandadır. Bu rəqiblə oyuna məsuliyyətlə yanaşırıq.

- "Qarabağ"a qayıtmağınız maraqlı oldu. Necə baş verdi?
- Bu, əksər insanlar üçün həm maraqlı, həm də gözlənilməz oldu. Amma mən evimə dönmüşəm. Özümü burada yaxşı hiss edirəm. "Qarabağ"la Avroliqanın qrup mərhələsində oynamışam. Yenidən həmin hissləri yaşamaq istəyirəm. Ümid edirəm ki, elə də olacaq.

- Qurban Qurbanov sizi necə qarşıladı?
- "İnter"dən ayrılandan sonra onunla danışdım. Elə oldu ki, yenidən 6 il oynadığım komandaya qayıtdım. Buna görə şadam.

- Bəs rəhbərlik?
- Rəhbərlik də əla qarşıladı. "Evinə xoş gəlmisən, Vüqar", dedilər. Hələ Tahir Gözəli görməmişəm. Yəqin ki, o da eyni sözü deyəcək.

- Başqa təkliflər var idi?
- Xeyr.

- "Qarabağ"ı tərk edəndə Qurban Qurbanovla münasibətlərinizin pozulduğuna görə klubdan getdiyiniz deyilirdi...
- Heç bir komandada kiminləsə problemim olmayıb. Çünki problemli adam deyiləm. Qurban Qurbanovla da problemim olmayıb. Ona həmişə hörmət etmişəm. Münasibətimiz də əla olub.

- "Qarabağ"a qayıtmağınız yığmaya da yolunuzu aça bilər?
- Öncə hələ "Qarabağ"da etimadı doğrultmalıyam. Ondan sonra yığmadan dəvət gözləmək olar.

- "Qarabağ"dan sonra "Xəzər Lənkəran"da, "Qəbələ"də, "İnter"də oynadınız. Hansında daha rahat idi?
- Hər üç klubda yaxşı futblçular, dostlarım var. Amma mən "Qarabağ"ın oyun tərzinə alışmışam. Qurban Qurbanov nəsə demək istəyəndə artıq onun nə istədiyini başa düşürəm.

- Çempionatın yeni mövsümündə ilk matçınız "İnter"ə qarşı olacaq...
- "Qarabağ"ın ilk turda keçmiş komandama qarşı oynaması da qismətdir. Oradakı uşaqların hamısını tanıyıram. Ümid edirəm ki, uğurlu nəticə qazanarıq.