Rəhman Hacıyev: Neftçi bu şansdan yararlana bilmədi

"Neftçi"nin yarımmüdafiəçisi Rəhman Hacıyev Avropa Liqasının ikinci təsnifat mərhələsi çərçivəsində Makedoniya "Şkendiya"sına qarşı keçirdikləri cavab oyunundan (0:1, ilk oyun 0:0) azerisport.az saytının suallarını cavablandırıb:

- Oyun barədə nə deyə bilərsiniz?
- Rəqibimiz güclü komanda idi. Biz çətin oldu. Bir səhv qol buraxmağımıza, eyni zamanda mübarizəni dayandırmağımıza səbəb oldu. Buraxılan qolun əvəzini çıxmaq istəsək də, Vançe Şikovun qırmızı vərəqə alması işimizi daha da çətinləşdirdi. Qol vəziyyətlərimiz olsa da, yararlana bilmədik. Onların ən azı birindən yararlana bilsəydik, mərhələ keçəcəkdik.

- Öz oyununuzdan razı qaldınız?
- Xeyr. Bu, mənim oyunum deyildi. Xəstə idim, yenicə sağalmışdım. Ola bilsin ki, yaxşı çıxış etməməyim bununla əlaqədar idi. Oyundan öncə cəmi bir neçə məşqə çıxmışdım.

- Bəs baş məşqçi niyə oyuna tam hazır olmayan futbolçuları meydana buraxır ki?
- Tam hazır olmadığımı deməzdim. Sadəcə, az məşq etmişdim.

- Bu uğursuzluğa görə klub rəhbərliyinə hansısa jest etməyi düşünürsünüz? Məsələn, bir aylıq maaşınızdan imtina etməyi...
- Buna qoy rəhbərlik qərar versin. Bizim kapitanımız, baş məşqçimiz var. Onlar daha yaxşı bilər.

- Avrokubok mövsümünü uğursuz adlandırmaq olar?
- Bəli, təəəssüf ki.

- "Neftçi" onsuz da çempionatda avrokuboklara vəsiqə verən yeri tuta bilməmişdi. Sizə elə gəlmir ki, məhz buna görə komandadan ciddi uğur gözləməyə dəyməzdi?
- Bu, bizim üçün bir şans idi. Təəssüf ki, bu şansdan yararlana bilmədik.

- Bu heyətlə yeni mövsümdə nəyə ümid edirsiniz?
- Komandada dəyişiklik çoxdur. Ehtiyatdakı oyunçularımızın çoxu gənclərdir. Çatışmazlıqlar var. Amma inanıram ki, çempionata qədər hər şey qaydasına düşəcək.