Cavid İmamverdiyev: Vəli Qasımovla aramızda problem yoxdur
"Neftçi"nin yarımmüdafiəçisi Cavid İmamverdiyev Avropa Liqasının ikinci təsnifat mərhələsi çərçivəsində Makedoniya "Şkendiya"sına qarşı keçirilmiş səfər oyunundan sonra azerisport.az saytının suallarını cavablandırıb:
- Oyun barədə nə deyə bilərsiniz?
- Çox çətin oyun oldu. Çox təəssüf ki, mərhələ keçə bilmədik. "Şkendiya"nı keçmək lazım idi. Hamımız qələbə qazanmağı çox istəyirdik. Bəlkə də karyeramda bu qədər məyus olmamışdım.
- Matçdakı ən real qol vəziyyətini siz boşa verdiniz...
- Qarşımda 3 oyunçu var idi, topu görmədim. Başla vurmaq istəsəm də, top qarnıma dəydi, yerə yıxıldım. Sonra isə rəqib qapıçı və müdafiəçi yaxınlığımda idi. Elə də real qol şansı olduğunu deməzdim. Həmin epizodda səhv etmirəmsə, ofsayd var idi.
- Azarkeşlərə nə deyə bilərsən?
- Onlara nəsə deməyə üzümüz yoxdu. Bu məğlubiyyətə görə də hamısından üzr istəyirəm. Özümüzü toparlayıb, ölkə çempionatına hazırlaşmalıyıq.
- Son vaxtlar az oynayırsan...
- Bu baş məşqçi Vəli Qasımovun qərarıdır. Yəqin ki, qol şanslarını qaçırmağım da oynamamağımla əlaqədardı. Özümü matçlara hazır sayıram və düşünürəm ki, start heyətində yer almalıyam, daha çox oynamalıyam. Amma baş məşqçimizin də fikrinə hörmətlə yanaşıram.
- Baş məşqçi ilə bu barədə söhbət etmisən?
- Belə söhbət olmayıb, amma məşqlərdə özümü sübut etməyə çalışıram. Aramızda heç bir problem yoxdur. Sadəcə, oynamadıqca oyun praktikam azalır, sonradan meydana çıxdıqda isə mənə çox çətin olur.
- Belə davam etsə, “Neftçi”dən ayrıla bilərsənmi?
- Oynamasam, məcburam ki, rəhbərliklə danışıb, bir qərara gəlib, başqa komandaya keçim. Elə yaşımdayam ki, ehtiyatda oturan vaxtım deyil.
