Krşevan Santini: Şkendiya ilə oyunların ikinci hissəsində daha yaxşı oynadıq

"Neftçi"nin qapıçısı Krşevan Santini Avropa Liqasının ikinci təsnifat mərhələsi çərçivəsində Makedoniya "Şkendiya"sına qarşı keçirdikləri cavab oyunundan (0:1, ilk oyun 0:0) sonra azerisport.az saytının da suallarını cavablandırıb:

- Matç barədə nə deyə bilərsiniz?
- Məğlubiyyətdən sonra nə danışmaq olar? Təəssüf ki, uduzduq. Qola qədər yaxşı oynadıq. Rəqibin doğma azarkeşləri qarşısında irəli atılacağını bilirdik.

- Komandanız ikinci hissədə daha yaxşı təsir bağışladı...
- Matçın əvvəlini də yaxşı keçirdik. Matçın ikinci hissəsində qırmızı vərəqə almağımız planlarımızı korladı.

- Sizə elə gəlmir ki, iki oyunu götürdükdə "Neftçi" mərhələ adlamağa layiq deyildi?
- Razı deyiləm. Niyə belə düşünürsünüz ki?

- Çünki rəqib sizə nisbətən daha yaxşı təsir bağışladı. Özü də hər iki oyunda...
- Qırmızı vərəqə bu gün rəqibin əlinə işlədi. Biz yorulmuşduq. Buna görə də hücuma atılmaqda çətinlik çəkirdik. Rəqib isə rahatca əks-hücumlar qururdu.

- Düşünmürsünüz ki, matçın sonundakı oyunu, hücum futbolunu ilk dəqiqələrdən sərgiləmək lazım idi?
- Belə rəqibə qarşı səfərdə oynamaq asan deyildi. İkinci hissədə isə riskə getməyə başladıq. Çünki itiriləsi heç nəyimiz qalmamışdı. Öz oyunumuzu göstərməkdə çətinlik çəkdik.

- Amma komandanız Bakıda da müdafiə futbolu sərgiləmişdi...
- Hər iki matçda ikinci hissəni daha yaxşı keçirdik. Amma təəssüf ki, bu uğur qazanmaq üçün yetərli olmadı. Bir qol cütün taleyini həll etdi.

- Cavid İmamverdiyevin matçın sonunda yüz faizlik qol epizodunu boşa verməsini necə şərh edərdiniz?
- Epizod çox uzaqda idi və dəqiq görmürdüm. Üzücü idi...