Vəli Qasımov: Qırmızı vərəqə planlarımıza daxil deyildi

"Neftçi"nin baş məşqçisi Vəli Qasımov Avropa Liqasının ikinci təsnifat mərhələsi çərçivəsində Makedoniyanın "Şkendiya" klubuna qarşı keçirdikləri cavab oyunundan sonra fikirlərini bölüşüb. Azerisport.az xəbər verir ki, 0:1 hesabıyla uduzduqları matçı belə şərh edib:

- Rəqibi qələbə münasibətilə təbrik edirəm. Yaxşı oynadıq. Qırmızı vərəqə planlarımıza daxil deyildi. Buna baxmayaraq, yenə qol vurmağa çalışdıq. Təəssüf ki, buna nail ola bilmədik. Məqsəd İsayevə də niyə sarı vərəqə göstərildiyini anlamadım.

- Sizə elə gəlmir ki, əvəzetmələrdə gecikdiniz?
- Seleksiya işlərimiz hələ davam edir. Ehtiyatdakı yeddi futbolçumuzdan dördü müdafiəçidir. Yarımmüdafiəni gücləndirmək istəyirik. Hücumçumuz olsaydı, daha yaxşı olardı. Hələ oyunçu çatışmazlığımız var.

- Hakimlikdən narazısınız?
- Hakimin bəzi mübahisəli qərarları oldu. Hətta bir epizodda onun qərarına etirazımı da bildirdim.

- Matçın sonunda Cavid İmamverdiyev əlverişli vəziyyətdən qol vurmağı bacarmadı. Onun klubdakı gələcəyi sual altında deyil?
- O, bizim futbolçumuzdur. Qol vursaydı, mərhələ adlaya bilərdik. Ondan öncə də qol vəziyyətlərimiz var idi. Təəssüf ki, onlardan yararlana bilmədik.

- Sizə elə gəlmir ki, matçın taleyi hələ ilk oyunda, sizin daha çox müdafiə olunmağınıza görə həll olunmuşdu?
- Razı deyiləm. Biz həmin oyunda sadəcə, qol buraxmaq istəmirdik. Bu gün isə Şikovun meydandan qovulması çox şeyi dəyişdi. Biz riskə getdik. Amma bu da bəhrəsiz qaldı.