İlter Ayyıldız: Kəpəzi yaxşı analiz etdiyimiz üçün mərhələ adladıq

Avstriyanın "Admira" klubunun yarımmüdafiəçisi İlter Ayyıldız Avropa Liqasının ikinci təsnifat mərhələsi çərçivəsində "Kəpəz"ə qarşı keçirdikləri cavab oyunundan (2:0, ilk oyun – 1:0) sonra azerisport.az saytının suallarını cavablandırıb.

- Bakıdakı oyunla bağlı təəssüratlarınız?
- Qələbə qazandığımıza görə şadıq. Fikrimcə, yaxşı oynadıq. Biz ilk oyunda da yaxşı çıxış etmişdik. Bakıya da uğur qazanmaq üçün gəlmişdik. Şadam ki, mərhələ adladıq.

- "Admira"nın növbəti mərhələyə problemsiz adladığını demək olar?
- Xeyr. Evdəki qələbədən sonra da belə düşünmürdük. "Kəpəz"ə yuxarıdan aşağı baxmırdıq. Onları yaxşı analiz etmişdik. Buna görə də mərhələ adladıq.

- "Kəpəz" son dəqiqələrdə təhlükəli vəziyyətlər yaratmağa başladı. Sizə elə gəlmir ki, onlar oyunun əvvəlindən elə aqressiv çıxış etsəydilər, daha çox problemlə üzləşərdiniz?
- Əlbəttə. Amma biz qol buraxmamaq üçün çox çalışdıq. Eyni zamanda bir qol vurub, rahat oynamağı düşünürdük.

- "Kəpəz" gözlədiyinizdən zəif çıxış etdi?
- Gəncəlilər meydanda var güclərini qoydular, çox qaçdılar, mübarizə apardılar. Amma bu, futboldur, kimsə qazanır, kimsə uduzur. "Kəpəz"i sərgilədiyi oyuna görə təbrik edirəm.

- Rəqibin heyətində kimi qeyd edərdiniz?
- Yaxşı futbolçuları var. Amma komandamız çox güclüdür. Ona görə də onlardan kimisə götürmək istəməzdim (gülür).

- "Admira" bu qələbə sayəsində qrup mərhələsinə daha da yaxınlaşdı...
- Biz qələbə qazanmaq, daha da irəliləmək istəyirik. Gənc komandayıq. Növəti rəqibimiz - "Slovan" güclü komandadır. Amma onları da keçmək üçün əlimizdən gələni edəcəyik.